په افغانستان کې د طالبانو د بهرنیو چارو سرپرست وزیر امیر خان متقي د ملګرو ملتونو د مالي او اداري چارو د مشورتي کمېټۍ له یوشمېر غړو سره خبرې کړې دي.
د طالبانو حکومت د بهرنیو چارو وزارت مرستیال ویاند حافظ ضیا احمد پر اېکس لیکلي دي چې د مې پر اوومه په کابل کې په غونډه کې په ملګرو ملتونو کې د افغانستان پر استازیتوب، د بشري مرستو پر موثریت او په افغانستان کې د انکشافي پروژو د ملاتړ پر امکان خبرې وشوې.
نن مالي او اداري چارو کې د ملګرو ملتونو مشورتي کمېټې غړو چي دبېلابېلو هیوادو ٢١ غړي لري او د یوناما استازو د افغانستان اسلامي امارت د بهرنیو چارو وزیر مولوي امیر خان متقي سره وکتل. په دې ناسته کې په ملګرو ملتونوکې دافغانستان پر استازیتوب، بشري مرستو پر مؤثریت او په افغانستان... pic.twitter.com/RdxCDLg6RI
— Hafiz Zia Ahmad (@HafizZiaAhmad) May 7, 2024
طالبانو د ناستې په اړه په خبرپاڼه کې ویلي دی چې متقي په شخصي یا خصوصي څانګه او یوشمېر نورو برخو کې د ښځو رول مهمه وباله.
د ملګرو ملتونو د مالي او اداري چارو د مشورتي کمېټۍ مشر بچار بونګ عبدالله، چې د یوه ۲۰ کسیزه پلاوي مشري په غاړه لري، ویلي چې افغانستان ته یې د سفر هدف د ملګرو ملتونو د مرستندويه ماموريت (یوناما) د چارو ارزونه ده او غواړي د افغانستان د لومړیتوبونو په اړه د ملګرو ملتونو عمومي جرګې ته معلومات وړاندې کړي.