د خیبر پښتونخوا په شمالي وزیرستان کې وسلوالو یو تن له تښتولو وروسته وژلی دی.
د میرلي پولیسو او د سیمې اوسېدونکو مشال راډیو ته وویل چې په حیدر خېلو کې د احتشام په نامه یو تن د مې پر ۱۶مه ناپېژندليو وسلوالو له خپل کلي تښتولی وو چې د جمعې پر سهار یې مړی د میرلي په هرمز کې وموندل شو.
د میرلي تاڼې چارواکي وایي، د نامعلومه کسانو ضد یې مقدمه لیکلې ده.
په شمالي وزیرستان کې له تېرو څو کلونو راهیسې د هدفي وژنو پېښې زیاتې شوي دي او دا د سږکال (۲۰۲۴ز) له پیل راهیسې هلته د هدفي وژنو ۱۹مه پېښه ده.
تېر کال په هغه ضلع کې د هدفي وژنو ۴۴ پیښې شوې وې چې تر ۵۰ زیات مشران، ځوانان، سیاسي او مدني فعالان او ځېنې سرکاري کسان پکې وژل شوي ول.
د مې پر څلورمه د تپي په سپلګه کلي کې د جماعت اسلامي پخوانی امیر او د سپلګه کلي منتخب چیرمین ملک رحمان الله وزير وسلوالو وژلی وو.
د شمالي وزيرستان ولسونو هلته د ناامنۍ او هدفي وژنو ضد احتجاجونه او جرګې کړې دي.
بلخوا حکومت او پوځ وایي په سیمه کې د امن راوستو ته ژمن دي او د دې لپاره یې هدفي عملیاتو ته دوام ورکړی دی.