د ملګرو ملتونو د ښځو څانګه وايي په افغانستان کې پر ښځو د طالبانو بندیزونو د ماشوم د زېږون پر وخت د ميندو مړینه ۵۰ فیصده زیاته کړې ده.
دې ادارې د مې پر ۲۵مه په خپل راپور کې ويلي چې د نجونو پر تعليم د طالبانو حکومت محدودیتونو تر وخت مخکې د نجونو ودول ۲۵ فېصده زیات کړې دي.
ملګرو ملتونه همداراز ويلي چې ۸۲ سلنه افغان مېرمنې وايي چې رواني يا نفسیاتي روغتيا یې ښه نه ده.
The restrictions on women’s rights in #Afghanistan reverberate across all sectors & facets of life.Our data projections link the ban on girls’ education with increases in child marriage by 25%, early childbearing by 45%, maternal mortality by 50%.More: https://t.co/yI1f678nCs
— UN Women Afghanistan (@unwomenafghan) May 25, 2024
طالبانو د ۲۰۲۱ز کال د اګست پر ۱۵مه په افغانستان کې په زور حکومت ونیوه او تر هغې وروسته یې په دفترونو کې پر ښځو د کار بندیز لګولی او له شپږم ټولګي پورته یې د نجونو ښوونځي بند کړي دي.
هغوی تر اوسه د ملګرو ملتونو راپور ته غبرګون نه دی ښوولی خو مخکې یې ويلي چې ملګري ملتونه او نورې نړیوالې ادارې یې باید په چارو کې مداخله و نه کړي.
د ملګرو ملتونو د ښځو څانګه وايي هغه راپور یې له ۲۰۲۲ز کال څخه تر روان ۲۰۲۴ز کاله پورې د افغانستان په ۳۴ ولایتونو کې له ۷۰۰ څخه زیاتو ښځو سره د مرکو پر اساس جوړ کړی دی.