د پاکستان پوځ وايي د پېښور په حسن خېلو کې یې له وسلوالو سره په نښته کې دوه سرتېري وژل شوي دي.
د پوځ د عامه اړيکو څانګې (ای اېس پي ار) په خبرپاڼه کې وويل چې د مې پر ۲۶مه یې د استخباراتي معلوماتو پر بنیاد د وسلوالو پر يو پټنځای عملیات کول چې نښته وشوه.
د خبرپاڼې له مخې، په نښته کې پینځه مشکوک وسلوال هم وژل شوي دي.
پوځ د وژل شويو سرتېرو نومونه کیپټن حسين جهانګیر او حوالدار شفیق الله ياد کړي دي.
په خبرپاڼه کې نه دي ويل شوي چې وسلوال د کومې ډلې غړي ول او تر اوسه کومې وسلوالې ډلې هم په دې اړه څه نه دي ويلي.