د هند په شمالي ایالت اترپردېش کې چارواکي وايي چې د مذهبي مراسمو پر مهال په ټېل ماټېل کې لږ تر لږه ۱۱۶ تنه وژل شوي دي. خو یوشمېر رسنۍ د جولای دویمې په پېښه کې د وژل شویو شمېر ۱۲۱ یادوي.
چارواکو ویلي دي چې زرګونه کسان د هندوانو د یو مذهبي مشر بولې بابا د یوې دیني غونډې لپاره له یوې خیمې وتل چې ټېل ماټېل جوړ شو او پکې ګڼ کسان ژوبل هم شول.
تر اوسه معلومه نه ده چې د خلکو د وار خطا کېدو او ټېل ماټېل لامل څه وو خو ځايي رسنیو د چارواکو په حواله ویلي دي چې کېدای شي چې په خیمه کې سخته ګرمي او د خلکو سا بندېدل یې یوه وجه وي.
د اترپردېش د پولیسو مشر پرشانت کمار ویلي دي چې په وژل شویو کې زیاتره ښځې او ماشومان دي.