جرمني په کراچۍ کې خپله قونسلګري د ناامنۍ د اندېښنو له امله تړلې ده

په کراچۍ کې د جرمني قونسلګري وایي، د امنیتي وجوهاتو له کبله یې په دغه ښار کې خپله قونسلګري تړلې ده.

قونسلګرۍ د جولای پر اتمه پر اېکس (پخوانی ټویټر) لیکلي چې له اروپایي اتحادیې بهر هېوادونو د وګړو لپاره قونسلګري تر امر ثاني تړل شوې ده. خو په بیان کې ويل شوي چې هغه کسان چې وار له مخه یې د ویزو لپاره درخواستونه ورکړي دي، کولی شي خپلې ویزې او پاسپورټونه له قونسلګرۍ څخه ترلاسه کړي.

قونسلګرۍ په دې اړه نور مالومات نه دي ورکړي او پاکستاني چارواکو لا هم په دې اړه څه نه دي ویلي.

په تېرو کلونو کې په کراچۍ کې د جرمني قونسلګري څو ځله د امنیتي اندیښنو له امله تړل شوې ده. د ۲۰۱۱ز کال په سېپتېمبر کې، قونسلګري د امنیتي خطرونو له کبله خپل فعالیتونه تر څو میاشتو درولي ول. په ۲۰۱۶ز کال کې هم د امنیتي وجوهاتو له امله قونسلګري موقتاً تړل شوې وه، خو وروسته یې خپل فعالیتونه بیا پیل کړل.