د ملګرو ملتونو د امنیت شورا د جولای پر نهمه د روسیې له خوا د اوکراین د پلازمېنې کییف د ماشومانو پر روغتون د شوي میزایلي برید په اړه بحث کوي.
په ملګرو ملتونو کې د بریتانیا استازي د امنیت شورا دا غونډه له هغه وروسته اعلان کړه چې د اوکراین ولسمشر وولودیمیر زېلېنسکي یې خواست کړی وو.
چارواکي وايي چې دا برید د روسیې له خوا د جولای پر اتمه د اوکراین پر یو شمېر ښارونو د شويو هغو حملو برخه وه چې لږ تر لږه ۴۱ کسان یې وژلي او لږ تر لږه ۱۴۰ نور یې ژوبل کړي دي.
په کییف کې د پوځي انتظامیې چارواکو ویلي چې یوازې پر روغتون په برید کې د درو ماشومانو په ګډون ۲۷ تنه وژل شوي دي.
د یادې انتظامیې د مشر سرهي پوپکو په وینا، په دې ترڅ کې ۸۲ کسان ژوبل شوي هم دي.