په شمالي وزیرستان کې د نجونو يو بل ښوونځی په بمونو ويجاړ شوی دی.
د ملي جمهوري غورځنګ مشر محسن داوړ د جولای پر ۲۲مه پر اېکس پاڼه (پخواني ټويټر) ليکلي چې په زيرکۍ سيمه کې د نجونو د مډل سکول ودانۍ ته د شپې مهال چاودېدونکۍ مواد ايښوول شوي ول.
داوړ د خپل ګوند د يو فعال، بلال خان هغه ويډيو هم خپره کړې ده چې نوموړی پکې د ويجاړ شوي ښوونځي پر پاتې شونو ولاړ دی او په سيمه کې د روانې ترهګرۍ په اړه خپلې اندېښنې څرګندوي.
Govt Girls Middle School in Zeraki, N. Waziristan was blown up by militants last night. NDM%27s Bilal sheds light on the situation. The forces that banned girls%27 education in Afghanistan are extending their darkness in our areas. The state stands by, complicit in the destruction. pic.twitter.com/5s9tvzViMG
— Mohsin Dawar (@mjdawar) July 22, 2024
تر اوسه پورې کومې وسلوالې ډلې او حکومت په دې اړه څه نه دي ويلي.
په شمالي وزيرستان کې په تېرو څلورو مياشتو کې دا د نجونو درېيم ښوونځی دی چې نامعلومه کسان یې په بمونو ويجاړوي. د روان ۲۰۲۴ز کال د مې پر ۲۵مه د شمالي وزیرستان د ګړیوم تحصيل شاخي مار سيمه کې نامعلومه وسلوالو د نجونو ښوونځی سوځولی وو.
تر دې وړاندې د مې پر اتمه نېټه هم ناڅرګنده وسلوالو د شمالي وزیرستان په شيوه سيمه کې د عافيه په نوم د جينکو سکول په چاودېدونکیو توکيو وران کړی وو چې بیا د پاکستان وزیراعظم شهباز شريف په امر په یوه اونۍ کې ورغول شو او زده کړې پکې له سره پیل شوې.
حکومت د هر پېښې وروسته د پلټنو د کولو او ويجاړوونکو د نیولو ژمنه کړې خو تر اوسه پورې يې هېڅوک نه دې نيولي.