اسراییل د حماس، چې امریکا او اروپايي ټولنه یې ترهګره ډله بولي، د نوي سیاسي مشر یحیا السنوار د ختمولو ژمنه کړې ده.
ګومان کېږي چې سنوار پر اسراییلو د ۲۰۲۳ز کال د اکتوبر اوومې هغو حملو اصلي طراح دی چې له وجې یې په غزې تړانګه کې د اسراییلو او حماس ترمینځ جګړه پیل شوه چې اوس ۱۱مې میاشتې ته داخله شوې ده.
د اسراییل د پوځ مشر جنرال هېرڅي هلېوي ویلي دي چې سنوار پیدا کوي او برید ورباندې کوي.
د نوموړي په خبره، له دې سره به حماس مجبور کړي چې ځان ته بل مشر ولټوي.
د اسراییلو وزیراعظم بنیامین نتنیاهو د اګست پر اوومه په یوه پوځي اډه کې د وینا پر مهال وویل چې هېواد یې د ځان دفاع ته ژمن دی.
دا په داسې حال کې ده چې حماس د خپل پخواني سیاسي مشر اسماعیل هنیه تر وژنې وروسته یحیا سنوار د ډلې نوی سیاسي مشر غوره کړ.
۶۲ کلن هنیه د جولای پر ۳۱مه سهار وختي په تهران کې په یو برید کې ووژل شو. ایران د هغه د وژنې پړه په اسراییلو اچوي خو اسراییلو لا په دې اړه رسماً څه نه دي ویلي.
د نوموړي د جنازې لمونځ د اګست پر لومړۍ نېټه د ایران ستر مذهبي مشر ایت الله علي خامنه يي په امامت کې وشو.