د اوکراین هوایي ځواک د سېپټېمبر پر۲۲مه خبر ورکړ چې دفاعي نظام یې د روسیې د وړمې شپې له ۸۰ څخه ۷۱ ډرون حملې په شا کړې دي.
د خبر له مخې، شپږ نور روسي ډرونونه د الکترونیکي جنګي وسایلو په مټ ناکاره شوي دي. د اوکراین هوایي ځواک د روسیې له لوري له اشغال شوې لوهانڅک سیمې څخه د توغندیو ورولو خبره هم کړې، خو دا یې نه دي ویلي چې له هغو سره څه وشول.
بلخوا د روسیې دفاع وزارت هم ویلي چې وړمه شپه یې ۱۵ اوکرایني ډرونونه تباه کړي دي.
هلته د اوکراین د دویم لوی ښار خارکییف ښاروال ایهور تریخوف د سېپټېمبر پر ۲۱مه ناوخته وویل چې د استوګنې پر یوې لوړې ودانۍ په یوه بمي برید کې لږ تر لږه ۱۲ اوکراینیان ژوبل شوي دي.
د اوکراین او روسیې جګړه کې ډرون ټکنالوژي مهم رول لوبوي. دواړه هېوادونه ډرونونه د څار، استخباراتو، او بریدونو لپاره کاروي. روسیه ځانمرګي ډرونونه کاروي، او اوکراین یې د الکترونیکي جنګي وسایلو په مټ شنډوي.
ډرونونه د ټیټ لګښت او لوړ موثریت له امله ډېر کارول کېږي. دواړه خواوې هڅه کوي خپل ډرون تولیدات پراخ کړي ترڅو په جګړه کې ستراتیژیک برلاسی ترلاسه کړي.