د کوز جنوبي وزيرستان انګور اډې پرلتوال وايي له یوې مودې راهیسې په احتجاج دي خو د دې باوجود چې حکومت او امنیتي ادارې ورسره ژمنې کوي، مسلې یې نه هوارېږي.
د انګور اډې پرلتوال د پاکستان له حکومته مطالبه لري چې له افغانستان سره دې د پخوا په شان ورته یوازې پر پاکستاني شناختي کارډ او افغان تذکرې د تګ راتګ اجازه ورکړي.
د پاکستان حکومت د ۲۰۲۳ز کال په نومبر کې له افغانستان سره د تګ راتګ لپاره قانوني سفري اسناد لرل لازمي کړي ول. په انګور اډه کې ځايي ولس او کاروباريانو د ۲۰۲۳ز کال د نومبر له ۱۲ مې راهیسې پرلت وهلی دی.
دوی وايي چې پر هغه لاره د سفري اسنادو لازمي کېدل د پولې د دواړو خواوو سوداګرو، مزدورانو، ټرانسپورټرانو او ولسونو اقتصاد اغېزمنوي.
له دې پرته د انګور اډې اوسېدونکي په خپله سیمه کې د تعلیم، صحت او نورو اسانتیاوو او خدماتو غوښتنې هم لري.
د کوز جنوبي وزیرستان د انګور اډې د پرلتوالو یو مشر مولانا تسبیح الله د اکتوبر پر ۲۳مه مشال راډيو ته وویل، چارواکو ورته په بیا بیا په مذاکراتو کې ډاډ ورکړی چې ستونزې به یې حل کړي خو عملي اقدام نه کوي.
اخوا د کوز جنوبي وزيرستان انتظامي مشر یا ډېپټي کمېشنر محمد ناصر خان مشال راډيو ته وویل، هڅه کوي چې د انګور اډې پرلتوالو ستونزې هوارې کړي.