د روسیې د بهرنیو چارو وزارت د اکتوبر پر ۲۹مه پر ۱۳۱ اسټرالیايي وګړو بندیزونه اعلان کړل چې له وجې به یې اوس دا کسان روسیې ته سفر نه شي کولای.
تر بندیزونو لاندې د راغلو کسانو په نوملړ کې د دفاع ادارې غړي، خبریالان او عام خلک شامل دي چې مسکو د روسیې ضد اېجنډا پر مخ وړلو تور ورباندې پوری کړی دی. روسیې دا بندیزونه د هغو اقداماتو په غبرګون کې لګولي چې اسټرالیا پر ځينو روسانو او ادارو بندیزونه ولګول.
روسیې چې پر کومو کسانو بندیزونه لګولي دي، په هغوی کې په اسټرالیا کې د اوکرایني سازمانونو د اتحادیې یوه مشره او د الېکټرو اپټيک سیسټمز او مایکرو اېکس په ګډون د یو شمیر نورو شرکتونو کارکوونکي شامل دي.
بلخوا روسیې د نیوزیلينډ د دفاع وزارت د درو مرستیال وزیرانو په ګډون پر نهو چارواکو هم بندیزونه لګولي دي.
د روسیې لخوا پر اوکراین تر يرغل وروسته اسټرالیا په روسيې له ۱۰۰۰ زياتو وګړو او ادارو باندې بندیزونه لګولي دي. ورته اقدام د نیوزیلینډ حکومت هم کړی دی.