په پاکستان کې د اپرېل له ۱۱ او ۱۲مې راهیسې د ورښتونو د لړیو پر مهال په بېلابېلو پېښو او سېلابونو کې د وژل شويو کسانو شمېر ۱۴۳ ته رسېدلی دی.
د ورښتونو په درو لړیو او سېلابونو کې تر ټولو زيات کسان په خيبر پښتونخوا کې وژل شوي دي چې شمېر يې ۸۳ ته رسېدلی دی.
په خیبر پښتونخوا کې د طبیعي ناورینونو پر وړاندې د مبارزې صوبايي ادارې (پي ډي اېم اې) ویاند احسان داوړ د مې پر لومړۍ نېټه مشال راډيو ته وويل چې په هغه صوبه کې د ورښتونو پر مهال تر ۳،۵۰۰ زیاتو کورونو ته هم زیان اوښتی دی.
نوموړی وايي، "یوازې [د بارانونو] په وروستۍ لړۍ کې ۱۷ کسان په حق رسېدلي دي. پر چا باندې کورونه راغورځېدلي او څوک د اسماني بجلۍ (تندرونو پرېوتو) له وجې مړه شوي دي."
د داوړ په وينا، خلکو ته د اوښتو ځاني او مالي زیانونو سروې د ضلعي انتظامیو په همکارۍ روانه ده او حکومت به زيانګالو ته به معاوضې ورکوي.
ستاسې سېسټم د HTML5 په چلولو کې ستونزه لري.
خیبر پښتونخوا کې بارانونو او سېلابونو زیانونه اړولي دي
د دې ترڅنګ په خيبر پښتونخوا او بلوچستان کې بارانونو او سېلابونو ګڼو فصلونو ته هم زيانونه اړولي دي.
په سوات کې د کروندګرو د ټولنې مشر رحمت علي خان وایي چې سږ کال بې وخته بارانونو د مېوو باغونو، فصلونو او په ځانګړې توګه غنمو ته ډېر تاوان رسولی دی.
نوموړی زياتوي چې تر بارانونو وروسته د درملو او سرې نرخونه هم زیات شوي دي.
بلخوا په خیبر پښتونخوا کې د چاپېریال ساتنې د حکومتي ادارې مرستیال مشر افسر خان د مې پر لومړۍ نېټه مشال راډيو ته وویل چې د زیاتو بارانونو لامل اقليمي بدلون دی چې د سېلابونو سبب کېږي.
دی وايي، د اب و هوا د بدلون د مخنیوي لپاره یې ادارې یوشمېر پروژې پر مخ وړي.
دا هم وګورئ:
خیبر پښتونخوا او بلوچستان کې تازه ورښتونو او سېلابونو نوره مرګژوبله اړولې دهپاکستان کې بارانونو او ږلۍ يوشمېر فصلونه زيانمن کړي ديخیبرپښتونخوا د اقلیمي بدلون له جدي خطر سره مخامخ دهبې وخته واورې د افغانستان کروندګر اندېښمن کړي دياخوا په بلوچستان کې د قدرتي افتونو پر وړاندې د مبارزې صوبايي ادارې (پي ډي اېم اې) په وروستیو کې وویل چې د تازه بارانونو پر مهال په بېلابېلو پېښو، تندر پرېوتو او سېلابونو کې د وژل شویو شمېر ۲۱ او د ژوبلو ۲۵ تنو ته لوړ شوی دی.
پي ډي اېم اې د اپرېل پر ۲۷مه په بیان کې زیاته کړې وه چې تېره اوونۍ د بارانونو او ږلۍ له وجې کې سېلاب راغلی چې پکې کورونو او د یوشمېر نورو ودانیو ترڅنګ سړکونو ته هم زیان اوښتی دی.
په همدې حال کې د بلوچستان حکومت د زیانونو معلومولو لپاره سروې پیل کړې ده.
بلخوا د پاکستان وزیراعظم میا شهباز شریف ویلي ول چې وفاقي حکومت په خیبر پښتونخوا او بلوچستان کې په ورښتونو او سېلابونو کې له ځپل شویو خلکو سره پوره مرسته کوي.