د پاکستان د بشري حقونو کمېشن ویلي دي چې پارلېمان دې د "بنسټپالنې او د بلوه ګرو د تاوتریخوالي د ختمولو لپاره ګډ هوډ ښکاره" کړي.
کمېشن د جون پر ۲۲مه پر اېکس، پخواني ټوېټر، په بیان کې په سوات کې د دیني مقدساتو د سپکاوي په تور د یو کس د وژنې تر پېښې وروسته له وفاقي اېتلافي حکومته غوښتي دي چې د دې ډول پېښو مخنیوي اقدامات دې وکړي.
پریس ریلیزپارلیمان بنیاد پرستی اور بلوائی تشدد کے خاتمے کے لیے متفقّہ عزم کا اظہار کرے: ایچ آر سی پیلاہور، 22 جون 2024۔ سوات میں قرآنِ پاک کی بے حرمتی کے الزام پر چالیس سالہ شخص کی ہجوم کے ہاتھوں پُر تشدد ہلاکت کے بعد ایچ آر سی پی نے وفاقی حکومت سے مطالبہ کیا ہے کہ وہ اِس طرح…
— Human Rights Commission of Pakistan (@HRCP87) June 22, 2024
کمېشن د سوات او په مې میاشت کې د پنجاب په سرګودا کې شوې پېښې ته په اشاره ویلي دي چې له یوې میاشتې څخه په کمه موده کې د مذهبي مقدساتو د سپکاوي په تور پر دوو کسانو د پارېدلو کسانو له حملو ښکاري چې ریاست د عقیدې په نوم د بلوه ګرو د تشدد پر پېښو "قصداً یا د ځینو وجوهاتو له وجې پر خپله عملدارۍ جوړجاړی (سمجوته)" کړی دی.
هغې خپلواکه ناحکومتي ادارې په خپل بیان کې زیاته کړې ده چې په خپلو لاسونو کې د قانون اخیستو د پېښو پلټنو لپاره د کمېټۍ جوړولو پر وړاندیز په پارلېمان کې بحث نه کېدل د خپګان خبره ده.
د پاکستان وفاقي حکومت لا د کمېشن د بیان په غبرګون کې څه نه دي ویلي.
د بشري حقونو کمېشن دا بیان تر هغې وروسته خپور کړی دی چې د جون پر ۲۰مه د سوات په مدین کې پارېدلو کسانو د پنجاب یو اوسېدونکی د دیني مقدساتو د سپکاوي په تور وواژه، پر تاڼې یې برید وکړ او ودانۍ ته یې اور واچاوه.
د خیبر پښتونخوا اعلاوزیر علي امین ګنډه پور د جون ۲۰مې پر ماخوستن په سوات کې د هغه کس د وژلو او د مدین تاڼې ته د اور اچولو د پېښې د پلټنو امر وکړ.
د سوات پولیسو د هغه کس د وژنې او پر تاڼې د برید په تړاو مقدمې دایرې کړې دي. د پولیسو یو لوړپوړي چارواکي د جون پر ۲۳مه وویل چې په هغه پېښه کې یې د ککړتیا په تور ۲۲ تنه نیولي دي.
په پاکستان کې وخت په وخت د مذهب د سپکاوي په نوم پېښې کېږي چې پکې زیاتره تورن کسان د نورو مذهبونو منونکي وي خو کله کله مسلمانان هم تورنېږي.
د روان کال د مې پر ۲۵مه د پنجاب په سرګودا (سرګودها) کې پارېدلو کسانو د دیني مقدساتو د سپکاوي په تور یو مسیحي وګړی وواهه او ژوبل یې کړ او وروسته یې د هغه د کورنۍ د بوټانو جوړولو کارخانې ته اور واچاوه.
په پاکستان کې د مذهب د سپکاوي د مجازاتو یو قانون هم موجود دی خو پر دې سربېره وخت په وخت خلک له خپل لوري اقدام کوي او له تشدده کار اخلي.