د پاکستان د بهرنیو چارو وزارت وايي، په لیبیا کې د کښتۍ د ډوبېدو له امله ۱۶ پاکستانیان وژل شوي او ۱۰ ورک دي.
وزارت د فیبروۍ پر ۱۱مه په یو بیان کې وویل چې د لیبیا ساحل ته نېږدې په ډوبه شوې کښتۍ کې ۶۳ پاکستانیان سواره ول.
د بیان ترمخه، په طرابلس کې د پاکستان سفارت د پېښې له خبرېدو وروسته، په لیبیا کې زاویه ښار ته خپل استازي واستول، چې هلته یې د ځایي چارواکو او د زاویه روغتون مسوولینو سره لیدلي او تر دې دمه یې د ۱۶ مړو هویت د پاکستاني پاسپورټونو له مخې تایید کړی دی.
د سفارت د معلوماتو له مخې، ۳۷ پاکستانیان ژوندي پاتې دي، چې له هغوی څخه یو تن په روغتون کې تر درملنې لاندې دی، ۳۳ د پولیسو په حراست کې دي، او ۳ نور کسان په طرابلس کې د پاکستان سفارت تر سرپرستۍ لاندې دي.
په اسلاماباد کې د پاکستان د بهرنیو چارو وزارت ویلي، چې دوی د دې پېښې په اړه له لیبیايي چارواکو سره د نورو اقداماتو لپاره اړیکې نیولي دي، ترڅو ورک شوي کسان وپلټل شي او د وژل شویو کسانو جسدونه پاکستان ته انتقال شي.
تر دې وړاندې چې د مراکش (المغرب) د بندري ښار سره نېږدې د هسپانيې (سپېن) پر لوري د روانې یوې کښتۍ د ډوبېدو په پېښه کې د ۴۴ پاکستانيانو په ګډون ۵۰ کسان وژل شوي ول.
په هغو وژل شویو کې د خیبر ضلعې دوه ځوانان هم شامل ول.
ستاسې سېسټم د HTML5 په چلولو کې ستونزه لري.
د کډوالو کښتۍ پېښه: خان فراز اپرېدی وايي تر اوسه یې د زوی هېڅ پته نه ده لګېدلې
د منځني ختیځ، افریقا او اسیا ډېری کډوال او پناه غوښتونکي په ناقانونه ډول اروپا ته د تګ لپاره د اوبو له لارې يونان او اېټالیا ته ځي چې وخت په وخت په لاره کې د کښتيو ډوبېدو پېښې کېږي چې پکې ګڼو کسانو ته مرګژوبله اوړي.
د واکېنګ بارډرز په وينا، په ۲۰۲۴ز کال کې يوازې هسپانيې ته په اوښتونکو کسانو کې يې ۱۰،۴۵۷ تر رسېدو مخکې مړه شوي دي.
د ۲۰۲۴ز کال په ډېسېمبر کې د یونان په ګافدوس ټاپو کې د کښتۍ ډوبېدو په پېښه کې پینځه پاکستانیان ووژل شول او ۴۷ نور ژغورل شوي ول.
له پاکستانه هر کال ګڼ وګړي د بې کارۍ، اقتصادي او امنیتي ستونزو او ښه ژوند په تکل په ناقانونه لارو اروپايي هېوادونو ته ځي. هغوی د انساني قاچاقبرانو په مرسته له خطرناکو لارو تېرېږي چې وخت په وخت پر ځمکنیو او سمندري لارو د مرګونو پېښو ښکار کېږي.
د ۲۰۲۳ز کال په جون کې په يونان کې د کډوالو يوه کښتۍ ډوبه شوې وه چې شاوخوا ۷۵۰ کسان پکې سپاره ول. په هغه پېښه کې شاوخوا ۳۰۰ کسان ووژل شول چې ګڼ پاکستانيان هم پکې شامل ول.