د پاکستان د مالیې وزارت چارواکو د پیسو نړیوال صندوق (ای اېم اېف) له پلاوي سره د درې اربه (مېلیارده) امریکايي ډالرو پور ترلاسه کولو په اړه غږېدلي دي.
وزارت د مارچ پر ۱۴مه پر اېکس په بیان کې ویلي دي چې د ای اېم اېف چارواکي نیتن پورټر په مشرۍ پلاوي په اسلام اباد کې د خزانې له وفاقي وزیر محمد اورنګزیب خان سره د پاکستان د اقتصادي او مالي چارو د دویمې ارزونې په تړاو خبرې وکړې.
Mr. Nathan Porter, the IMF Mission Chief for Pakistan, and Federal Minister for Finance Mr. Muhammad Aurangzeb along with their teams started second review of Stand-by Arrangement today in Islamabad. pic.twitter.com/MuK0qrjDS4
— Ministry of Finance, Government of Pakistan (@Financegovpk) March 14, 2024
په خبرپاڼه کې ویل شوي دي، چې دواړو لورو د مالي پیاوړتیا په برخه کې د حکومتي هڅو، اصلاحاتو، د انرژۍ څانګې د پیاوړتیا او د حکومتي ادارو د انتظام په اړه خبرې کړي دي.
وزارت تر دې یوه ورځ مخکې ویلي ول چې د ارزونې غونډه به څلور ورځې دوام ولري او هیله یې ښوولې وه چې تر هغې وروسته به له ای اېم اېف سره د مامورانو پر کچ د پور موافقې ته ورسېږي.
وزارت زیاته کړی وه چې که وروستۍ ارزونه بریالۍ شي، نو صندوق به پاکستان ته د شاوخوا ۱.۱ اربه ډالرو قسط ورکړي.
پاکستان په داسې حال کې له ای اېم ایفه د پور د تازه قسط ترلاسه کولو هڅې کوي، چې د ډالر په مقابله کې د روپۍ ارزښت پرېوتی دی، په هغه هېواد کې د بهرنیو اسعارو یا پیسو زېرمې کمې شوې دي، انفلېشن یا افراط زر ۲۳ سلنه لوړه شوې او د دولتي بانک پر پورونو د سود سطح ۲۲ فیصده ته رسېدلې ده.
پاکستان له ۲۰۱۹ز کال راهیسې له اقتصادي بحران سره مخامخ دی او په هم هغه کال یې د پیسو له نړیوال صندوق سره د شپږو اربو ډالرو د پور درې کلن تړون لاسلیک کړی وو.
ای اېم اېف د روان کال په جنورۍ کې پاکستان ته د څه باندې ۷۰۵ مېليونه ډالرو پور قسط ورکړی وو.