د پنجاب په پبي کې د پاکستان او امریکا د پوځیانو ترمینځ ګډ تمرینونه پیل شوي دي.
د پاکستان د پوځ د عامه اړیکو دفتر (ای اېس پي ار) د جولای پر درېیمه په بیان کې ویلي دي چې د ګډو مشقونو موخه د دواړو هېوادونو د ځواکونو ترمینځ د ترهګرۍ پرضد په مبارزه کې د تاکتیکي وړتیاوو او مهارتونو شریکول دي.
په بیان کې راغلي دي چې د دواړو هېوادونو پوځیان به له یو بل سره د تجربو د شریکولو ترڅنګ په ترهګرۍ ضد عملیاتو کې کارېدونکې طریقې او کړنلارې لا پیاوړې کړي.
ای اېس پي ار زیاتوي چې دا تمرینونه، چې د جون پر ۲۹مه د ترهګرۍ پرضد په ملي مرکز پیل شوي، به تر دوو اونیو روان وي.
ستاسې سېسټم د HTML5 په چلولو کې ستونزه لري.
پنجاب کې د پاکستانیو او امریکايي پوځیانو ګډ تمرینونه پیل شوي دي
دا په داسې حال کې ده چې په اسلام اباد کې امریکايي سفیر ډانلډ بلوم ویلي دي چې له پاکستان سره دوه اړخیزه تعلقات پراخوي.
نوموړي د جولای پر دویمه یوې غونډې ته وویل چې واشنګټن له پاکستان سره د امنیت او سوداګرۍ په برخه کې شریک کار ته دوام ورکوي.
په پنجاب کې پوځي مشقونه پر داسې مهال کېږي چې د امریکا د استازو جرګې د جون پر ۲۵مه نېټه په "پاکستان کې د جمهوریت او بشري حقونو ملاتړ" تر سرلیک لاندې په منظور کړي پرېکړه ليک کې پر ولسمشر جو بایډن غږ کړی وو چې له پاکستان سره دې د ولسواکۍ، بشري حقونو او د قانون د واکمنۍ په پر ځای کولو کې ګډه همکاري وکړي.
د دې په غبرګون کې د پاکستان بهرنیو چارو وزارت د جون پر ۲۶مه په بیان کې وویل چې اسلام اباد باور لري چې د هغه قرارداد وخت او پس منظر د دواړو هېوادونو د مثبتو اړيکو له محرکاتو سره سمون نه خوري او دا د پاکستان د سياسي حالاتو او انتخاباتي عمل په اړه د نیمګړې پوهې نتيجه ده.
تر دې وروسته د جون پر ۲۸مه د پاکستان قامي اسمبلۍ یو پرېکړه لیک منظور کړ چې پکې یې استازو جرګې پر قرارداد اندېښنه ښکاره کړه.
سمونه: په دې خبر کې مخکې لیکل شوي ول چې تمرینونه د نوښار په پبو کې پیل شوي دي. دا تېروتنه وه او مشقونه د پنجاب په پبي سیمه کې کېږي.