د سیند حکومت د پښتون ژغورنې غورځنګ (پي ټي اېم) د کراچۍ څانګې د مشر په ګډون ۱۱ کسان نیولي او د یوې میاشتې لپاره یې د جیکب اباد زندان ته استولي دي.
دسيند صوبې د کورنیو چارو وزارت یوه چارواکي چې له رسنیو سره یې د خبرو اجازه نه لرله د جولای پر ۱۸مه یې د نوم نه ښوولو په شرط مشال راډیو ته وویل چې د غورځنګ د کراچۍ د مشر نورالله ترین په ګډون یې د ۱۱ کسانو پر ضد د عامه نظم ساتلو د قانون د درېیمې مادې (۳ اېم پي او) له مخې مقدمه دایره کړې ده.
د قانون له هغې مادې سره سم، که حکومت دا وګڼي چې یو کس عامه نظم او د خلکو خوندیتوب ته ګواښ پېښولای شي، نو بیا یې د نیولو امر کولای شي.
د چارواکي په وینا، هغو کسانو په سهراب ګوټ سيمه کې د "حالاتو خرابولو هڅه کوله" چې پولیسو نیولي او د اګست د ۱۶ مې نېټې پوری یې بندي کړي دي.
دا په داسې حال کې ده چې د غورځنګ نور الله ترین او د هغه پینځه نور ملګري عادل شاه، يار محمد، ثاقب انګار، اکرام الله قسمت پښتين او حکمت الله پښتین د جولای پر۱۵مه د کراچۍ ګلزارهجري تاڼې ته تر ورتګ وروسته کورونو ته نه ول ستانه شوي خو هغه وخت یې پولیسو له نیولو ناخبري ښوولې وه.
د کورنیو چارو وزارت د پي ټي اېم د مخکښه غړو د زنداني کولو په اړه یو فرمان هم خپور کړی دی. له هغو شپږو کسانو پرته، پاتې نور غړي محمد هاشم، محمد عثمان الیاس، بخت الله، مدي الرحمان او محمد اکرم د جولای پر ۱۶مه ګرفتار شوي ول.
بلخوا په کراچۍ کې د پي ټي اېم ویاند رويد الله د جولای پر ۱۸مه مشال راډیو ته وویل چې له درو ورځو راهیسې د خپلو ملګرو په لټه وو خو پولیسو ورته هېڅ معلومات نه ورکول.
د پښتون ژغورنې غورځنګ مشر منظور پښتین د جولای پر ۱۸مه مشال راډیو ته وویل چې ریاستي ادارو په وروستیو مياشتو کې د پي ټي اېم په لسګونو فعالان نیولي او پر ضد یې د "درواغو مقدمې" جوړی کړي دي.
بلخوا د سيند حکومت د اطلاعاتو وزير شرجيل انعام مېمن د جولای پر ۱۸مه مشال راډيو ته وویل چې هر څوک چې د قانون پرضد کار کوي یا د حالاتو خرابولو هڅه کوي، نو پرضد به یې قانوني اقدام کوي.
د غورځنګ د کراچۍ څانګې مشر نور الله ترین او نور غړي د خلکو د بېلابېلو مسلو د هواري لپاره اکثر تاڼو ته ځي او هلته له پولیسو سره ملاقاتونه کوي.
تر دې مخکې په ۲۰۱۸ز او ۲۰۱۹ز کال کې هم پولیسو ترین او د هغه یوشمېر ملګري نیولي ول چې بیا یې په ضمانت خوشې کړل.
دا هم وګورئ:
پي ټي اېم وايي د کراچۍ پولیسو نور الله ترین او د غورځنګ ۵ نور غړي نیولي ديکراچۍ کې د ۲ کسانو د وژنې ضد احتجاجي پرلت ختم شوی دیکراچۍ: پوليسو د پښتون ژغورنې غورځنګ دوه مخکښ غړي نيوليپه وروستیو کې پولیسو او امنیتي ادارو د پښتون ژغورنې غورځنګ کسان یوشمېر فعالان نیولي چې ځینې یې په ضمانتونو خوشې کړي دي.
پي ټي اېم وایي، امنیتي ادارو یې یو فعال ګیله من وزیر د جولای پر څلورمه په پېښور کې له هوايي ډګر سره نېږدې نيولی او نامعلوم ځای ته یې لېږدولی دی.
د پاکستان د استخباراتي ادارې یوه چارواکي مشال راډیو ته ویلي ول چې د پلټنو وفاقي ادارې (اېف ای اې) چارواکو وزیر د امنیتي ادارو پرضد د کرکې خپرولو په تور نیولی دی.
تر دې مخکې د جون پر ۱۸مه په شمالي وزیرستان کې پوځ د غورځنګ مخکښ او له جنوبي وزیرستانه د قامي اسمبلۍ استازی علي وزیر ونیوه چې د جون پر ۲۴مه یې ضمانت منظور شو.
د جون پر ۱۶مه د ډېره اسماعیل خان صدر تاڼې پولیسو د غورځنګ بل مخکښ عالمزېب مسید او د هغه خوریی محمد سجاد له خپله کوره ګرفتار کړي ول او دعوه يې کړې وه چې له هغوی سره یې "چرس نیولي" دي. د هغوی ضمانت د جون پر ۲۶مه وشو.
داراز د مې پر ۳۰مه امنيتي ځواکونو د پي ټي اېم د شمالي وزیرستان رابطه کار عید رحمان وزیر، جلال خان او زکیم وزیر هم ونيول.
پښتون ژغورنې غورځنګ د خپلو فعالانو د نیونې ضد د جون پر نهمه په میرلي کې پرلت پیل کړی وو چې وروسته یې میرامشا ته وغځاوه.
د غورځنګ مشر منظور پښتین د جون پر ۲۵مه وویل چې پر دې شرط د یوې اوونۍ لپاره خپل پرلت ځنډوي چې نیولي ملګري به یې خلاص شي.