د هغې ۲۲ کلنې نجلۍ مړینې په ایران کې دننه او بهر غوسه راپارولې چې د دې هېواد پولیسو له خوا د حجاب د قانون د ماتولو په تور تر نیول کېدو درې ورځې وروسته مړه شوه.
د مهسا امیني د نیول کېدو عیني شاهدانو ژورنالېستانو ویلي، هغه د "ګشت ارشاد" په نوم د ایران د پولیسو تر نیول کېدو سملاسي وروسته د پولیسو په موټر کې وهل شوې ډبول شوې ده.
د دې ایرانۍ د مړینې خبر په تهران کې اعتراضونه راپورته کړل.
په ټولنیزو رسنیو کې خپرې شوې ویډیوګانې ښيي چې په تهران کې اعتراض کونکې "مرګ پر دیکتاتور" چې اشاره یې د ایران لوی مشر ایت الله علي خامنه يي ته ده نارې وهي او موټر چلوونکي د هغه روغتون سره په نږدې واټ د خپلو موټر هارنونه غږوي چېرې چې مهسا امینې د کوما په حالت کې بستر شوې وه.
د امریکا سپینې ماڼۍ د جمعې په ورځ دا مړینه "نه بخښونکې" وبلله.
د امریکا د ولسمشر بایډن د ملي امنیت سلاکار جک سولیوان پر خپل ټویټر لیکلي: "موږ د ۲۲ کلنې مهسا امیني په مړینه چې ویل کېږي د ایران د اخلاقو د پولیسو په توقیف کې وهل شوې ډبول شوې ژور اندېښمن یوو. د هغه مړینه نه بخښونکې ده."
دا هم وګورئ: د ایران اصلاح غوښتونکي اېتلاف د نومیالي سیاستوال خوشې کولو غوښتنه کړېد امریکا د ملي امنیت سلاکار زیاته کړې چې هېواد یې ایراني چارواکي د بشري حقونو د دا ډول سرغړاویو مسوول بولي.
د ایران لپاره د امریکا ځانګړي استازي رابرټ مولي چې د ایران سره د ۲۰۱۵م کال د اټومي تړون د بیا احیا هڅو کې ښکېل دی، ویلي، هغوی چې په دې وژنه کې لاس لري باید حساب ورسره وشي.
د بخښنې نړیوال سازمان هم غبرګون ښودلی، دا مړینه یې"مشکوکه" بللې او په اړه یې د څېړنو غوښتنه کړې.
ویل کېږي چې مهسا امیني د ایران له لوېدیځ ولایت کردستان څخه د دې هېواد پلازمېنې تهران ته د خپلو خپلوانو د لیدلو لپاره تللې وه چې د سېپټېمبر په ۱۳مه د تهران د "ګشت ارشاد" په نوم پولیسو له خوا ونیول شوه.
دا پولیس تر ډېره د ایران په ښارونو کې د ښځو له خوا د حجاب پر رعایت او همدارنګه پر ښځو او سړیو د ځینو نورو محدودیتونو د ساتلو څارنه کوي.
ستاسې سېسټم د HTML5 په چلولو کې ستونزه لري.
اسراييلی موسيقار: ايران ته تګ مې لوی ارمان دی
د نوموړې له نیول کېدو څو ساعته وروسته د هغې کورنۍ ته خبر ورکړل شو چې مهسا امیني روغتون کې بستر شوې ده.
د مهسا امیني مور مژګان امیني د خپل لور له مړینې لږ وروسته د مشال راډیو فردا څانګې ته وویل چې کورنۍ یې د ایران پولیسو سره په دې اړه شکایت ثبت کړی دی. هغې ویلي لور یې تر نیول کېدو مخکې روغه جوړه او صحتمنده وه.
د تهران د پولیسو د رسنیو مرکز د عیني شاهدانو هغه ادعاوې رد کړي چې ګوندې مهسا امیني وهل شوې ډبول شوې ده او ویلي یې دي مهسا امیني یې د نامناسب حجاب له کبله د " توجیه او پوهاوي" په خاطر د پولیسو یو مرکز ته وړې وه چې ناڅاپي پرې د زړه حمله راغله .
خو د مهسا کورنۍ، عیني شاهدان او ګڼ ایراني معترضان دا نه مني او ټینګار کوي چې دا ۲۲ کلنه نجلۍ د پولیسو له خوا تر نیول کېدو وروسته وهل شوې ډبول شوې او له همدې کبله کوما ته تللې ده.
د مهسا امینې مړینې په خواله رسنیو کې هم د ایرانیانو او د بشري حقونو د فعالانو پراخ غبرګونونه او غوسه راپارولې ده.