په پاکستان کې د قامي او څلورواړه صوبايي اسمبلیو د څوکیو ډکولو لپاره د عامو انتخاباتو تر ترسره کېدو وروسته د رایو شمېر روان دی او انتخاباتي کمېشن ویلي دي چې انتخابات راڼه ول.
د انتخاباتي کمېشن له مهالوېش سره سم، د رایې اچونې بهیر د فبرورۍ اتمې پر سهار اته بجې (د کابل اووه نیمې) پیل شو چې بې له ځنډه د ماښام تر پینځو بجو پورې روان وو.
د انتخاباتي کمېشن د مشر څرګندونې
د پاکستان د انتخاباتي کمېشن مشر سکندر سلطان راجا ویلي دي چې د فبرورۍ پر اتمه په هېواد کې پارلېماني انتخابات "۱۰۰ فیصده شفاف او په سوله ییزه" توګه ترسره شول.
دولتي ټېلېوېژن د نوموړي له خولې ویلي دي چې هېچا هېڅ وګړی له رایې ورکولو نه دی ګرځولی.
ټېلېوېژن وايي چې دا څرګندونې نوموړي د کمېشن په ودانۍ کې کړې دي او وايي چې هر ځای د انټرنېټ ستونزه وي، هلته به انتخاباتي چارواکی خپله د انتخاباتو ضلعي چارواکي دفتر ته ځي او هلته به د نتیجو فارم (۴۵م نمبر فارم) داخلوي.
راجا زیاته کړې ده چې د انتخاباتي نتیجو په نظام کې ټولې نتیجې دایرېږي.
انتخاباتي بهیر څنګه وو؟
د کمېشن مشر په سوله ییز ډول د انتخاباتو ترسره کېدو دعوه وکړه خو د خیبر پښتونخوا او بلوچستان په مختلفو سیمو کې د ناامنۍ پېښې وشوې او داراز، د شمالي وزیرستان د میرامشا په تپي سیمه کې ځینو ګوندونو تور پورې کړ چې وسلوالو په پولېنګ سټېشنونو کې د جمعیت علمای اسلام (ف) له ووټرانو پرته نور هېڅوک رایې کارونې ته نه پرېښوول.
جمعیت علمای اسلام (ف) لا د دې تور په غبرګون کې څه نه دي ویلي خو د شمالي وزیرستان د پولیسو مشر روښانزېب دا دعوه ناسمه وبلله او مشال راډیو ته یې وویل چې ټول پولېنګ سټېشنونه د پولیسو تر ولکې لاندې ول، امنیت یې سم وو او د رایې اچونې بهیر پکې عادي روان وو.
په پېښور، مردان، کوټه، کراچۍ، لاهور، اسلام اباد او د خیبر پښتونخوا په یوشمېر نورو ښارونو کې د مشال راډیو خبریالان وايي، په زیاتره سیمو کې انتخاباتي بهیر عادي او ارام وو.
د پېښور په ګډون د پاکستان په زیاتره لویو ښارونو کې د ګرځنده ټېلېفون انټرنېټي خدمات ځنډول شوي ول چې د ګوندونو تر څنګ یې د بشري حقونو د کمېشن غبرګونونه وپارول.
د پاکستان د کورنيو چارو وزارت ويلي ول چې دا ګام يې هلته د ناامنۍ د پېښو د مخنيوي لپاره ورته کړی وو. وزارت د فبرورۍ پر اتمه ناوخته په يو بيان کې ادعا وکړه چې د پاکستان په يوشمېر ښارونو کې يې د موبایل ټېلېفون شبکه او انټرنېټ بحال کړي دي او په نورو ښارونو کې به يې هم بحال کړي، خو په خپلواکه توګه د دې ادعا پخلی نه دی شوی.
په کوټه او کراچۍ کې د مشال راډیو خبریالان وايي، د فبرورۍ اوومې پر بریدونو سربېره خلک د رایې اچونې مرکزونو ته ځي.
د پاکستان حکومت د فبرورۍ پر اتمه په ټول ملک کې عامه رخصتي (چوټي) اعلان کړې وه.
د څوکیو، نوماندانو او رجسټرډ ووټرانو شمېر
په پاکستان کې د قامي اسمبلۍ ۲۶۶ عمومي څوکۍ دي چې ورڅخه یې پر ۲۶۵ انتخابات وشول او پر یوې څوکۍ ټاکنې وځنډول شوې.
له دې پرته، د خیبر پښتونخوا د اسمبلۍ له ۱۱۵ څخه د ۱۱۳ څوکیو ډکولو لپاره د رایې اچونې بهیر ترسره شو. داراز، د پنجاب د ۲۹۷، د سیند ۱۳۰ او د بلوچستان اسمبلۍ له ۵۱ څخه پر ۵۰ څوکیو ټاکنې وشوې.
د انتخاباتي کمېشن په وینا، د پاکستان د قامي اسمبلۍ د عمومي څوکیو لپاره د ۵،۱۲۱ نوماندانو ترمینځ سیالي وشوه چې له هغو څخه یې ۳۱۲ ښځې، دوه نرښځیان او پاتې سړي دي.
داراز، د څلورو صوبايي اسمبلیو د ۵۹۰ څوکیو ډکولو لپاره د ۱۲،۶۹۵ امېدوارانو ترمینځ سیالي وشوه چې ورڅخه یې ۵۷۰ ښځې، دوه نرښځیان او پاتې سړي دي.
د پاکستان د انتخاباتي کمېشن په وینا، د هغه هېواد ۱۲۸.۵ مېلیونه وګړو خپل ووټ کارولای شو چې د هغه هېواد د نفوس ۵۳.۲ فيصده جوړوي.
د کمېشن له ارقامو سره سم، په ټولو ووټرانو کې څه کم ۵۴ فيصده سړي او څه باندې ۴۶ فيصده ښځې وې.
د ۲۰۲۳ز کال د سرشمېرنې له مخې د پاکستان ابادي څه باندې ۲۴۱ مېلیونه ده.
دا هم وګورئ:
ډېره اسماعیل خان او ټانک کې د ناامنۍ پېښو کې ۶ سرتېري وژل شوي ديشمالي وزیرستان کې د انتخاباتو پر مهال د ناامنۍ ۳ پېښې شويد بشري حقونو کمېشن: حکومت دې ژرترژره انټرنېټ او ټېلېفوني شبکه بحاله کړي په کراچۍ کې د رايو شمېرلو بهير روان دید ناامنۍ پېښې او امنیتي اقدامات
ټولټاکنې پر داسې مهال وشوې چې په وروستیو کې په پاکستان، په ځانګړي ډول په خیبر پښتونخوا او بلوچستان صوبو، کې ناامني زیاته شوې ده.
د فبرورۍ پر اتمه په ټانک او ډېره اسماعیل خان کې په دوو بریدونو کې پینځه پولیس او یو پوځي سرتېری ووژل شول.
تر دې یوه ورځ مخکې د سیند په مرکز کراچۍ او د بلوچستان په پښتون مېشته سیمو پښین او کلا سیف الله کې د انتخاباتي نوماندانو له دفترونو سره نېږدې په چاودنو کې ۳۰ تنه ووژل او تر ۳۰ زیات ژوبل شول.
د اسلامي دولت (داعش) خراسان څانګې په پښین او کلا سیف الله کې د حملو ذمه واري ومنله خو د کراچۍ د چاودنې ذمه واري لا چا نه ده منلې.
خو د پاکستان وفاقي او صوبايي حکومتونو ویلي ول چې د انتخاباتو د امنیت لپاره یې انتظامات کړي دي.
د پاکستان لنډمهالي حکومت د رایې اچونې مرکزونو او انتخاباتي بهیر د امنیت لپاره شاوخوا شپږ نیم لکه پولیس او د پوځ په ګډون د نورو ځواکونو سرتېري ځای پر ځای کړي دي.
حکومت ویلي ول چې د رایو اچولو په هر مرکز کې څلور پوليس سرتېري ځای پر ځای کېږي خو په حساسو سيمو کې به یې شمېر زيات وي.
اخوا د پاکستان د بهرنیو چارو وزارت د فبرورۍ پر اوومه د انتخاباتو پر ورځ له افغانستان او ایران سره د تګ راتګ ټولو لارو تړلو اعلان وکړ او و یې ویل چې پولې د فبرورۍ پر نهمه بیا پرانیزي.