پاکستانیو چارواکو هغه ۱۳کلنه عیسوۍ نجلۍ ژغورلې چې په مبینه ډول په زور مسلمانه شوې او یوه ۴۴ کلن سړي ته واده شوې وه.
دا خبره د نجلۍ کورنۍ، چارواکو او وکیل د نومبر پر درېیمه کړې.
د عیسوۍ کورنۍ وکیل جبران ناصر ویلي چې پولیسو نجلۍ په کراچۍ کې د ښځو یوه پناه ځای ته بیولې او د نومبر تر پېنځمې عدالت ته تر حاضرېدو به هلته اوسي.
د ښځو د حقونو لپاره کارکوونکو او عیسویو تنظیمونو تر درخواستونو وروسته عدالت پولیسو ته د نجلۍ د خوشې کولو او د هغه کس د ګرفتارۍ امر وکړ چې له تور سره سم، دا نجلۍ یې تښتولې وه او درې اوونۍ ورکه وه.
د دې کس نوم نه دی ښوول شوی او په اړه یې ویل کېږي چې د اغېزمنې کورنۍ ګاونډی وو چې ټاکل شوې د نومبر پر څلورمه عدالت ته وړاندې شي.
جبران ناصر هیله من دی چې د ماشومې د سکول سرټېفېکټ او سرکاري اسناد به ثابته کړي چې هغه نابالغه ده او پر دې اساس به یې مور و پلار ته وسپارل شي.
سیند های کورټ په ابتدا کې د نجلۍ هغه بیان منلی وو چې پکې دې ویلي ول چې ۱۸ کلنه ده.
په صوبه کې د واده قانوني عمر ۱۸ کاله دی.
فعالان په پاکستان کې د غريبو عيسايي او هندو کورنيو د نجونو په زوره د مسلمانولو او ودولو پېښې د يوې غټې ستونزې په توګه يادوي.
په ۲۰۱۹ز کې په پاکستان کې په مبينه توګه د دوو هندوو خويندو تر تښتولو او مسلمانولو وروسته د هغوی د واده وېډيو پر ټولنيزه ميډيا خپره او ورسره دغه موضوع ګرمه شوه.
په ملګرو ملتونو کې د ماشومانو ادارې يونيسيف ويلي، په پاکستان کې ۲۱ سلنه نجونه تر ۱۸ کلنۍ پورې او درې سلنه ۱۵ کلنۍ ته تر رسېدو مخکې ودېږي.