په پاکستان کې مدني او سیاسي فعالانو، خبریالانو او ځايي رسنیو دعوه کړې چې د بلوچستان په هرنايي کې د احتجاج پر مهال د امنیتي ځواکونو په ډزو کې یو کس وژل شوی او یوشمېر ژوبل دي.
د ملي جمهوري غورځنګ مشر او په قامي اسمبلۍ کې د شمالي وزیرستان استازي محسن داوړ د اګست پر ۱۴مه پر ټوېټر په بیان کې ویلي دي چې وژل شوی کس خالقداد بابړ نومېږي چې د عوامي نیشنل ګوند غړی وو.
Strongly condemn the indiscriminate firing by Pak army soldiers on unarmed protestors in Harnai Balochistan.This resulted in the death of Khaliqdad, a member of ANP. Many were injured as well. These incidents keep happening because there are no legal consequences for perpetrators pic.twitter.com/9sDHckifIs
— Mohsin Dawar (@mjdawar) August 14, 2022
داوړ په خپل بیان کې "پر بې وسلې مظاهره کوونکو" د امنیتي ځواکونو د ډزو غندنه کړې.
یوه ځايي خبریال نواب خان مشال راډیو ته وویل، د هرنايي خلکو د اګست ۱۳مې او ۱۴مې ترمینځ شپې مهال د امنیتي ځواکونو په عملیاتو کې د دوو کسانو د ژوبلېدو ضد د پوځي کلا مخې ته مظاهره کوله چې د تاوتریخوالي پېښه وشوه.
دا په داسې حال کې ده چې د پاکستان پوځ ویلي دي چې وسله والو د اګست پر ۱۳مه شپې ناوخته د هرنايي په کوسټ (خوست) سیمه کې د ځواکونو پر پوستې برید کړی.
د پوځ د عامه اړیکو دفتر (ای اېس پي ار) د اګست پر ۱۴مه ویلي دي چې امنیتي ځواکونو د وسله والو برید شنډ کړ.
په بیان کې راغلي، وسله وال تر حملې وروسته "نېږدې غرونو ته وتښتېدل" او چې ځواکونو یې د "محاصره کولو" هڅه کوله نو په ډزو کې دوه سرتېري قیوم جاوېد او محمد عاطف ووژل شول.
بیان زیاتوي چې د دواړو خواوو ترمینځ په ډزو کې د پوځ یو افسر مېجر عمر ژوبل شوی دی.
فعالان او ځايي خبریالان وايي، شپې مهال د پوځیانو په ډزو کې دوه ځايي کسان ژوبل شوي ول.
د پښتون ژغورنې غورځنګ مشر منظور پښتین پر ټوېټر په بیان کې لیکلي دي چې ځايي وګړو د پوځي عملیاتو ضد احتجاج کاوه چې "پاکستانیو ځواکونو ورباندې ډزې" وکړې.
Pakistani forces fired upon protestors in district #Harnai killing ANP worker Khaliq Daad & injured many. Locals had staged protests against yesterday%27s military operation in the said area. Through such tactics Pashtuns are kept subjugated.#JusticeForKhaliqDaad #DaSangaAzadiDa pic.twitter.com/nDljSBC4j5
— Manzoor Pashteen (@ManzoorPashteen) August 14, 2022
ځايي رسنۍ بلوچستان پوسټ هم پر ټوېټر ورته خبره کړې او ویډیو یې هم خپره کړې چې پکې ډزې اورېدل کېږي او لسګونه کسان له هغه ځايه تښتي.
یو ازاد خبریال مالک اڅکزي پر ټوېټر لیکلي چې د هرنايي "پر سوله ییزو خلکو د ځواکونو ډزو" مرګژوبله اړولې ده. نوموړي البته په پېښه کې د وژل شویو او ژوبلو کره شمېر نه دی ورکړی.
مشال راډیو په خپلواکه توګه د فعالانو او خبریالانو دعوې نه شي تاییدولای.
تر اوسه معلومه نه ده چې په کوسټ سیمه کې پر پوستې کومې ډلې حمله کړې وه او چا یې ذمه واري هم نه ده منلې.
موږ په سیمه کې د تاوتریخوالي پېښې په اړه د بلوچستان له حکومتي چارواکو سره د رابطې هڅه وکړه خو بریالي نه شو.