په پاکستان کې یو عدالت د وسله والې ډلې لشکر طیبه یوه مشر ذکي الرحمان لکوي ته د ترهګرۍ تمویل په تور د پينځه کلونو د بند سزا اورولې.
د پنجاب د پولیسو د ترهګرۍ مخنیوۍ څانګې د جنورۍ پر اتمه وویل چې په لاهور کې د ترهګرۍ ضد یوه عدالت نوموړي ته د ۳۰۰،۰۰۰ روپیو د جرمانې سزا هم اورولې.
پر لشکر طیبه ډلې په ۲۰۰۸ز کال کې د هند په ممبۍ کې د بریدونو تور دی.
دا ډله له ۲۰۰۲ز کال راهیسې په پاکستان کې تر بندیز لاندې ده او ورباندې له نړیوالې وسله والې ډلې القاعدې سره د اړیکو او تعلق تور دی.
د پنجاب پوليسو د ترهګرۍ مخنيوي څانګې د جنورۍ پر دويمه لکوي له لاهوره ګرفتاره کړی وو.
تر دې درې ورځې وروسته، د جنورۍ پر پینځمه، امریکا په پاکستان کې د لشکر طيبه د دې قومندان د ګرفتارۍ هرکلی وکړ.
د امریکا د بهرنيو چارو وزارت د سويلي او مرکزي اسيا څانګې د جنورۍ پرپنځمه پر ټوېټر ليکلي "د لکوي ګرفتاري د ترهګرۍ په ملاتړ او تمويل کې د رول لپاره د هغه ذمه وار بللو په برخه کې يو مهم ګام دی."
د امریکا د بهرنيو چارو وزارت وايي، "په عدالت کې به د هغه د قضيې اورېدنه، او ورته سزا اورول له نزدې څاري او ټينګار کوي چې له نوموړي څخه د ممبۍ په بريدونو کې د ککړتيا په اړه حساب او پوښتنې وشي."
پر ذکي الرحمان لکوي تور دی چې په ۲۰۰۸ز کال کې د هند په ممبۍ ښار کې د بریدونو پلان يې جوړ کړی وو چې پکې د امريکايانو او نورو بهرنیانو په ګډون تر۱۷۰ زيات کسان وژل شوي او په سلګونو ژوبل شوي ول.
تر هغو بريدونو وروسته لکوي په پاکستان کې ونيول شو او د څه وخت لپاره د راولپېنډۍ په اډیاله زندان کې بندي وو خو لږه موده وروسته په ضمانت خوشې شو.
د پنجاب د پوليسو د ترهګرۍ مخنيوي څانګې د جنورۍ پر دویمه په بيان کې ويلي په ذکي الرحمان لکوي د ډسپنسرۍ يا کلينک په نوم د ترهګرو لپاره پېسو ټولولو او د ترهګریزو فعالیتونو لپاره کارولو په تور د لاهور په يوه تاڼه کې مقدمه درج شوې وه.
ملګرو ملتونو په ۲۰۰۸ز کال کې د ذکي الرحمان لکوي نوم د ترهګرو په نوملړ کې شامل کړ.
لکوي د يوې بلې ناقانونه ډلې جماعت الدعوه د مشر حافظ سعید نېږدې ملګری ګڼل کېږي.
حافظ سعيد هم د ۲۰۱۹ز کال په جولای کې پوليسو ونيوه.
د ۲۰۲۰ کال په نومبر کې د لاهور یوه عدالت سعید ته د ترهګرۍ تمویل په تور د پينځه نیمو کلونو د بند سزا اورولې وه.
تر دې مخکې په ۲۰۱۹ز کال کې هم يوه عدالت سعيد ته د ترهګرۍ تمویل په دوو نورو قضیو کې د پینځه نیمو، پینځه نیموکلونو د بند سزا اورولې وه. خو نوموړی پرځان لګېدلي تورونه ردوي.
په ۲۰۱۴ز کال امريکا جماعت الدعوه د ترهګرو ډلو نوملړ ته واچوله او بنديزونه یې ورباندې ولګول.
په ۲۰۱۵ز کال کې پاکستان اعلان وکړ چې د جماعت الدعوه په ګډون د هغو ټولو تنظيمونو شتمنۍ يې کنګل کړې دي چې ملګرو ملتونو پرې بنديزونه لګولي.
پاکستان دا ګامونه پر داسې مهال پورته کړې دي چې د ناقانونه پیسو د څار نړیوالې ادارې (اېف اې ټي اېف) په خړ لېسټ کې دی.
پاکستان له ۲۰۱۸ز کال راهیسې د اېف اې ټي اېف په خړ لېسټ کې دی.
دې پاریس مېشته ادارې د تېر کال (۲۰۲۰) په اکتوبر کې پاکستان ته د ترهګرۍ تمویل او د ناقانونه پیسو سپینولو په لړ کې د نورو اقداماتو سپارښتنه او د ۲۰۲۱ز کال تر فېبرورۍ پورې د څار په "خړ لېسټ" کې د ساتلو پرېکړه وکړه.