رسنۍ وايي، د پاکستان حکومت په افغانستان کې د طالبانو له حکومته غوښتي دي چې د جیش محمد ډلې مشر مولانا مسعود اظهر ونیسي.
جیش محمد تنظیم په پاکستان کې تر بندیز لاندې دی.
خو د طالبانو حکومت په افغانستان کې د اظهر د موجودګۍ خبرونه رد کړي دي.
پاکستانیو رسنیو د سېپټېمبر پر ۱۳مه وویل، د هغه هېواد د بهرنیو چارو وزارت په یوه رسمي لیک کې د طالبانو له حکومته غوښتي چې اظهر ګرفتار کړي.
جیو نیوز ټېلېوېژن وايي، د وزارت یوه لوړپوړي چارواکي ورته د نوم نه ښوولو په شرط ویلي چې په لیک کې له طالبانو غوښتنه شوې چې د اظهر د اوسېدو ځای معلوم کړي، اسلام اباد دې ورڅخه خبر کړي. هغه چارواکي وایلي چې په لیک کې راغلي چې د اسلام اباد په باور اظهر د افغانستان په کوم ځای کې اوسي.
نورو پاکستانیو رسنیو هم د بهرنیو چارو وزارت د چارواکو په حواله ورته خبره کړې خو د پاکستان د بهرنیو چارو وزارت ویاند پر دې موضوع له څه ویلو ډډه کړې.
پاکستاني رسنۍ وايي چې د هغه هېواد د بهرنیو چارو وزارت طالبانو ته په استولي لیک کې ویلي چې ښايي اظهر په ننګرهار یا کونړ کې وي.
د طالبانو حکومت په افغانستان کې د مسعود اظهر د موجودګۍ په اړه رپورټونه رد کړي دي.
د طالبانو د حکومت د بهرنیو چارو وزارت ویاند عبدالقهار بلخي د سېپټېمبر پر ۱۴مه پر ټوېټر په بیان کې ویلي دي چې اظهر د افغانستان په خاوره کې پناه نه ده اخیستې.
د ا.ا.ا. د بهرنيو چارو وزارت د رسنيو هغه راپورونه ردوي چې ګواکې د پاکستانۍ جيش محمد ډلې مشر، مسعود اظهر د افغانستان په خاوره کې پناه اخيستې.غواړو په ډاګه کړو، چې اسلامي امارت پخپله خاوره کې د هېڅ هېواد مخالفو وسلهوالو ته د فعاليت اجازه نه ورکوي. pic.twitter.com/EM5XbPU6fE
— Abdul Qahar Balkhi (@QaharBalkhi) September 14, 2022
بلخي په بیان کې ویلي چې بې له شواهدو او اسنادو دا ډول رپورټونه د افغانستان او پاکستان پر اړیکو منفي اغېز لرلای شي.
نوموړي د خپل حکومت دا دریځ تکرار کړی چې د افغانستان خاوره هېڅ وسله والې ډلې ته د نورو هېوادونو پرضد کارېدو ته نه پرېږدي.
د مشال او ازادي راډیوګانو د انګرېزۍ ژبې د ووبپاڼې مدیر او خبریال ابوبکر صدیق وايي، مسعود اظهر د "دېوبندي فرقې" د نظریې پلوی دی او "په پاکستان کې یو وتلی جهادي قوماندان یا مشر ګڼل کېږي. پر ده ډېر تورونه ده او [نوم یې] د ملګرو ملتونو او نورو هېوادونو د [ترهګرۍ] په لېسټونو کې شامل دی؛ په [همدې] خاطر پاکستان یو وخت د پنجاب په بهاولپور کې په خپل کور کې نظربند کړی وو خو که اوس دی خلاص شوی وي او افغانستان ته تللی وي نو دا د دې ښکارندوی دی چې پر پاکستان نړیوال فشار دی چې په افغانستان کې د [ترهګرو] هغسې ځالې جوړې نه شي چې د طالبانو په پخواني حکومت کې وې."
دا هم وګورئ:
ملګرو ملتونو د جیش محمد مشر مسعود اظهر ترهګر ونوماوه پنجاب حکومت د جيش محمد مرکزي مدرسه په خپل واک کې اخیستې دهپاکستان دې د هند ورانولو خوبونه پرېږدي: موديبریکس تنظيم پاکستان ميشتې ډلې لشکر طيبه او جيش محمد وغندلېپاکستان له خوا د ناقانونه ډلو ضد اقدامات به د نړيوالو اندېښنې ځواب کړي؟مسعود اظهر په ۱۹۹۹ز کال کې د طالبانو واکمنۍ پرمهال د یوې هندۍ مسافر وړونکې الوتکې په تښتولو کې په لاس لرلو تورن وو او له همدې کبله نوي دلي له اسلام اباده د هغه د ورسپارلو غوښتنه کوله.
پر جیش محمد ډلې په هند او د هغه هېواد تر واک لاندې کشمیر کې د وسله والو فعالیتونو یوشمېر تورونه پورې شوي دي او هغې ډلې یې ذمه وارۍ هم منلې دي.
د ۲۰۱۹ز کال په فبرورۍ کې د هند تر واک لاندې د کشمیر په پلواما کې پر سرتېرو د پاکستان مېشته وسله والې ډلې جیش محمد تر موټر بم ځانمرګي برید وروسته د نوي دلي او اسلام اباد اړیکي ترینګلي شول او د دواړو هېوادونو ترمینځ تاوتریخوالی هم وشو.