د پاکستان دولتي راډیو وايي، د هغه هېواد نومیالۍ سندرغاړې نیره نور د ۷۱ کلونو په عمر کې مړه شوې ده.
راډیو ویلي دي چې نوموړې له یوې مودې راهیسې ناروغه وه او د اګست پر ۲۰مه په کراچۍ کې مړه شوه.
د پاکستان وزیراعظم شهباز شریف، ولسمشر عارف علوي، یوشمېر نورو لوړپوړو چارواکو او بېلابېلو شخصیتونو د نیرې نور په مړینه د خپګان څرګندونه کړې ده.
شریف د اګست پر ۲۱مه پر ټوېټر په بیان کې ویلي دي چې نور په اواز کې د "ترنم او سوز له وجې ځانګړی نوم ګټلی" وو.
نامور گلوکارہ نیرہ نور کا انتقال موسیقی کی دنیا کے لیے ایک نا قابل تلافی نقصان ہے۔ وہ اپنی آواز میں ترنم اور سوز کی وجہ سے خاص پہچان رکھتی تھیں۔ غزل ہو یا گیت جو بھی انہوں نے گایا کمال گایا۔ان کی وفات سے پیدا ہونے والا خلا کبھی پُر نہیں ہوگا۔ اللہ تعالی مرحومہ کو جنت میں جگہ دے۔
— Shehbaz Sharif (@CMShehbaz) August 21, 2022
د اطلاعاتو او خپرونو چارو وزیر مریم اورنګزېب د اګست پر ۲۱مه پر ټوېټر په بیان کې ویلي دي چې د هغې له مړینې سره د "موسیقۍ یو دور پای ته ورسېد."
اورنګزېب لیکلي چې نیره نور د "خوږ غږ او د سندرو ویلو د ځانګړي انداز" څښتنه وه.
دولتي راډیو وايي چې نور په ۱۹۵۰ز کال کې د هند په اسام ایالت کې زېږېدلې وه او کورنۍ یې په ۱۹۵۷ز کال کې پاکستان ته کډه شوه.
د راډیو په خبره، نور د "پاکستان بلبلې" په نوم پېژندل کېده چې په ۲۰۰۵ز کال کې ورته ولسمشر اعلا انعام ورکړی وو.
نیره نور د راډیو او ټېلېوېژن لپاره ډېرې سندرې، غزلونه او ملي نغمې ویلې وې چې له وجې یې په پاکستان او سیمه کې خورا لوی نوم ګټلی وو.