د پاکستان په یو شمېر ښارونو کې د جولای پر ۲۰مه د پولیو واکسیني کیمپېن پیل شوی دی.
دا د مارچ په نیمايي کې په هېواد کې د کورونا وایرس وبا مخنیوي لپاره د ټولبند او محدودیتونو تر اعلان وروسته د پولیو د څاڅکو لومړی کیمپېن دی.
تر دې مخکې په فبرورۍ کې د پولیو واکسیني کیمپېن شوی وو.
ټاکل شوې چې له درې څخه تر پېنځو ورځو پورې په دې کیمپېن کې به د جنوبي وزیرستان، کوټې، کراچۍ، اټک او فیصل اباد په ځینو برخو کې تر پېنځو کلونو پورې عمر لرونکي شاوخوا ۸۰۰،۰۰۰ ماشومان واکسین شي.
حکومتي چارواکو پولیسو ته امر کړی چې د روغتیايي کارکوونکو امنیت دې باوري کړي.
چارواکو د جولای پر ۱۸مه مشال راډيو ته دا هم ویلي ول چې د ګوزڼ واکسیني کارکوونکي یې روزلي چې ځان له کورونا وایرسه وساتي.
پاکستان او افغانستان د نړۍ یوازیني هېوادونه دي چې لا هم پکې د پولیو له وجې ماشومان معذورېږي.
د پاکستاني چارواکو په وینا، په روان کال کې په ټول ملک کې ۵۸ ماشومان ګوزڼ وهلي دي.
په ۲۰۱۹ز کال کې په ټول ملک کې ۱۴۷ ماشومان د پولیو وایرس ښکار شوي ول.
د روغتیايي چارو لپاره د وزیراعظم سلاکار ډاکټر ظفر مرزا د جولای پر ۱۸مه پر ټوېټر په بیان کې ویلي چې د کورونا وایرس وبايي حالاتو له ښه کېدو سره سم د پولیو واکسیني کیمپېنونه کوي او ټول روغتیايي کارکوونکي به احتیاطونه کوي.