د پاکستان چارواکي وايي، له لاهور سره نېږدې یې پر لویه لار د بچیو مخې ته پر یوې ښځې د جنسي تېري په تور ۱۴ مشکوک کسان نیولي دي.
د لاهور د پولیسو مشر عمر شیخ د سېپټېمبر پر ۱۰مه خبري غونډې ته وویل، دا ښځه د سېپټېمبر پر نهمه شپې شاوخوا ۱۲ نیمې بجې له خپلو بچیو سره په ګاډي کې له لاهوره په ګوجراوالې کې د خپلې خسرګنۍ کور پر لوري روانه وه چې له ګوجرپورې سیمې سره یې په ګاډي کې تېل ختم شول او د لاهور او سیالکوټ پر لویه لار ودرېده.
د ده په خبره، دې ښځې په ګوجراواله کې یوه خپلوان ته ټېلېفون وکړ او هغه ورته وویل چې د پولیسو پر شمېرې زنګ ووهي او ورڅخه مرسته وغواړي.
شیخ وايي، د شپې درې بجي یوه کس پولیسو ته زنګ وواهه چې وسله وال په زور یوه ښځه له ګاډي باسي.
د لاهور د پولیسو مشر په وینا، پولیس سمدستي سیمې ته ورسېدل او لومړنۍ پلټنې ښيي چې دوه وسله وال ورغلي ول او هلته یې پر ښځې جنسي تېری وکړ.
د کورنیو او احتساب چارو لپاره د وزیراعظم سلاکار شهزاد اکبر هم په خبري غونډه کې موجود وو او ویې ویل چې عمران خان د پېښې نوټس اخیستی دی.
د ده په خبره، د انتظامیې د ناکامۍ له وجې دا پېښه وشوه:
"موږ هېڅکله دا ډول جرم نشو زغملای." د سپېټېمبر پر ۱۰مه "مو چې وزیراعظم صاحب خبر کړ نو هغوی د پنجاب د پولیسو مشر ته لارښوونه وکړه او له اعلا وزیر سره یې خبرې وکړې. چې څوک هم پکې ککړ وي، د قانون منګولو ته یې سپارو. دا کار د زغملو وړ نه دی."
د لاهور د پولیسو مشر عمر شیخ وویل، وسله والو چې کله د ګاډي ښیښه ماتوله نو ژوبل شوي چې د وینې او ډي اېن اې له لارې یې د پېژندګلوۍ هڅې کوي.
ده زیاته کړه چې د پېښې له ځای سره نېږدې درې کلي دي او هلته هم له خلکو پوښتنې او تحقیقات کوي.
د پنجاب پولیسو په وینا، وسله والو تر تېري وروسته له ښځې پیسې او ګاڼه یا زېورات هم اخیستي دي.
د پنجاب حکومت ویاندې بیان
Punjab Police and allied departments are working in close coordination to capture those involved in Painful motorway incident. So far 12 suspects have been arrested and search is going on.
— Musarrat Cheema (@MusarratCheema) September 10, 2020
د صوبايي حکومت ویاندې مسرت چیمه پر ټوېټر په بیان کې لیکلي چې د پنجاب پولیس او نورې ادارې په "همغږۍ په خواشینوونکې پېښه کې د ککړو کسانو ګرفتارۍ" هڅې کوي.
د پنجاب اعلا وزیر عثمان بزدار د انصاف ژمنه کړې او وايي "پر موټروې چې هر چا پر [ښځې] تشدد کړی وي، سخته سزا به وویني."
پر ټوېټر د شهباز شریف بیان
بچوں کے ہمراہ سفر کرنے والی خاتون کی بے حرمتی نہایت قابل مذمت، شرمناک اور افسوسناک ہے۔ یہ قومی شرمندگی اور قانون کی عمل داری کے پورے نظام کے مفلوج ہونے کا ثبوت ہے۔ زینب کیس کی طرز پر تحقیق وتفتیش کا معیار ایسا رکھا جائے کہ پراسیکیوشن کے مرحلے پر مجرم سزا سے نہ بچ پائیں۔
— Shehbaz Sharif (@CMShehbaz) September 10, 2020
د پنجاب پخواني اعلا وزیر او د اپوزیشن مشر شهباز شریف پر ټوېټر په بیان کې دا "دردوونکې پېښه بللې او د کوټلو اقداماتو غږ یې کړی دی."
په پاکستان کې د ډله ییز جنسي تېري پېښې نسبتاً کمې دي خو په هېواد کې وخت په وخت د جنسي ځورونو او پر ښځو د تشدد پېښې کېږي.