نیاز علي په کراچۍ کې د مشال راډیو خبریال دی او هلته پر سیاسي، امنیتي او اقتصادي چارو رپورټونه جوړوي.
په کراچۍ کې د طالبانو د واک لاندې د قونسلګرۍ مشر سید عبدالجبار د ډېسېمبر پر شپږمه مشال راډیو ته وویل چې یوه ورځ مخکې ۱۱۴ افغانان د کراچۍ له مرکزي او ملیر زندانونو څخه خوشې شول او د چمن له لارې هېواد ته لېږدول شوي دي.
د ژغورنې ادارې او حکومتي چارواکو په وینا، اور د ډېسېمبر پر شپږمه مازیګر پینځه بجې ولګېد چې درې ساعته وروسته یې وواژه او د پېښې د لامل معلومولو لپاره یې پلټنې پیل کړې دي.
پښتون ژغورنې غورځنګ (پي ټي اېم) د خپل مشر منظور پشتین د نیولو پر ضد د ډېسېمبر پرپينځمه د پېښور، کوټې او اسلام اباد په ګډون د پاکستان په يوشمېر ښارونو کې احتجاجونه وکړل او له حکومته یې وغوښتل چې منظور پشتین دې ژر تر ژره خوشې کړي.
د کراچۍ صدر دارټیلري ميدان تاڼې د پولیسو مشر امین کوسو د ډیسېمبر پر دریمه مشال راډیو ته وویل چې هغه کسانو د احتجاج په مهال د ریاستي ادارو ضد وېناګانې کړي او هڅه یې کوله چې خلک د ریاست ضد راوپاروي.
د سېند په ټټه کې د مغلو د زمانې د واکمنانو یوه لویه تاریخي هدیره ده چې پکې زرګونه قبرونه دي. خلک د دغو تاریخي قبرونو د سېل لپاره هلته ورځي. په دې هدیره کې د ۱۴مې پېړۍ نه تر ۱۸مې پېړۍ پورې د واکمنانو مړي ښخ دي. د مشال راډیو خبریال هلته ورغلی وو او دا ویډیويي راپور یې پرې جوړ کړی دی.
پښتون ژغورنې غورځنګ (پي ټي اېم)، ملي جمهوري غورځنګ (اېن ډي اېم) او پښتونخوا نیشنل عوامي ګوند د پاکستان له حکومته غوښتي دي چې د بې اسناده افغانانو د ایستلو بهیر دې ودروي. د پي ټي اېم او هغو ګوندونو غړو او پلویانو تور پورې کړ چې د سیند پولیس هلته عادي پښتانه د بې اسناده افغانانو په نوم ځوروي.
د جرګې مشرانو د ډېسېمبر پر لومړۍ نېټه مشال راډیو ته وویل، ټاکل شوې وه چې جرګه د حیدراباد په یوه ودانۍ کې وشي او د دې لپاره یې له مرستیال کمېشنره اجازت اخیستې وو خو د هغې باوجود پولیسو جرګې ته پرې نه ښودل او د ودانۍ مالک یې هم ګرفتار کړ.
د پاکستان چارواکو د نومبر له لومړۍ راهیسې د بې اسناده افغانانو ستنولو ته دوام ورکړی دی او د چارواکو په وینا، د هغې مياشتې تر پايه تر ۴۰۰،۰۰۰ زيات افغانان پر تورخم، چمن او نورو لارو افغانستان ته اوښتي دي.
د نومبر په ۲۵مه سهار وختي په کراچۍ کې په یو سوداګریز مرکز کې د اورلګېدو پېښه کې لږ تر لږه ۱۱ کسان مړه او ۱۳ نور ژوبل شول. د اور وژنې ادارې له اتو ساعتونو وروسته په اور قابو وموند. تر دې مهاله د اور لګېدنې علت نه دی په ډاګه شوی. نور حال په دې ویډیويي راپور کې.
په کراچۍ کې د اور وژنې د ادارې یو چارواکي افسر علي د نومبر په ۲۵مه مشال راډیو ته وویل، د اور لګېدو دا پېښه تېره شپه د راشد منهاس سړک په یو سوداګریز مرکز کې مخې ته راغلې ده چې پکې لږ تر لږه ۵۰ دوکانونه هم سوځېدلې دي.
ترین تر غونډې وروسته له مشال راډیو سره په خبرو کې زیاته کړه چې يوه اوونې وړاندې په حیدر اباد کې پولیسو ۶۴ پښتانه نیولي ول چې یوازې اته پکې افغانان او نور ټول د پاکستان شناختي کارډ لرونکي پښتانه ول.
پولیسو په بیان کې زیاته کړې ده چې "هېڅ سرتېري یا افسر ته د پاکستان د کوم وګړي یا اسناد لرونکو بهرنیانو" د ځورولو اجازه نه ورکوي. دا په داسې حال کې ده چې د پاکستان چارواکو د نومبر له لومړۍ نېټې راهیسې بې اسناده افغانان نیسي او هېواد ته یې ستنوي.
په کراچۍ کې د نرښځيانو اتحاديې د نومبر پر ۱۹مه د مورت مارچ په نوم داسې غونډه وکړه چې په ګڼ شمېر نرښځيانو او مدني فعالانو پکې ګډون کړی وو.
د نومبر پر ۱۸مه د ځوانو ډاکترانو د ټولنې یوشمېر مخکښه مشرانو او غړو د کراچۍ د خبریالانو د مرکز مخې ته مظاهره وکړه او چارواکو ته یې ۴۸ ساعته وخت ورکړ چې ډاکتر محمد اسماعیل اڅکزی پیدا کړي.
په کراچۍ کې د افغان کډوالو د نیونو او په زور له پاکستانه د ایستلو ضد یو ځل بیا احتجاج شوی دی. د نومبر ۱۸مې د احتجاج تابیا د افغان کډوالو د مرستو لپاره جوړې کمېټۍ کړې وه چې د ګوندونو غړو، وکیلانو او د بشري حقونو فعالانو هم پکې ګډون وکړ.
د حیدراباد اوسېدونکي جان محمد خان د نومبر پر ۱۶مه، مشال راډیو ته وویل چې په حیدراباد، جامشورو، بدین او نورو ښارونو کې پولیس پښتانه کاروباریان نیسي، تاڼو ته یې بیايي او بیا ورڅخه د پیسو تر اخیستو وروسته یې خوشې کوي.
د نومبر پر ۱۱مه په کراچۍ پریس کلب کې د کمېټې غړو په خبري غونډه کې تور پورې کړ چې پولیس ځيني اسناد لرونکي افغان کډوال هم باسي.
د ګوند د سیند صوبې مشر شاهي سید د نومبر پر نهمه د کراچۍ په مردان هاوس کې تر خبري غونډې وروسته مشال راډیو ته وویل، د عامو پښتنو له خوا یې شکایتونه ترلاسه کړي چې حکومت یې د افغان کډوالو په نوم ځوروي.
د هغې کمېټۍ يوې غړې او د بشري حقونو فعالې وکيلې سارا ملکاني تر اورېدنې وروسته مشال راډيو ته وويل چې په درخواست کې یې غوښتنه کړې وه چې له قانوني عمل پرته دې افغانان له پاکستانه نه ایستل کېږي ځکه چې دا د هغوی د بشري حقونو د تروړلو معنا لري.
نور وښیئ
