د افغانستان د کرکټ ملي لوبډلې په درېیمه یو ورځنۍ سیالي کې بنګلادېش ته ماتې ورکړه.
دا په داسې حال کې ده چې کوربه هېواد بنګلادېش د درو سیالیو د لړۍ لومړۍ دوه وار له مخه ګټلې دي.
د فبرورۍ پر ۲۸مه لومړی بنګلادېش بیټېنګ وکړ او په ۴۷م اوور کې یې د ټولو لوبغاړو په سوځېدو ۱۹۲ منډې جوړې کړې.
د بنګلادېش لېتن داس ۸۶ او شکېب الحسن ۳۰ منډې جوړې کړې.
د افغانستان راشد خان درې، محمد نبي دوه او فضل حق فاروقي او عظمت الله عمرزي یو، یو لوبغاړی وسوځاوه.
په ځواب کې افغان لوبډلې د ۱۹۳ منډو هدف په ۴۱م اوور کې پوره کړل او په دې توګه یې ۵۰ اووریزه سیالي په اووه وېکټو وګټله.
د افغان لوبډلې رحمان الله ګربز ۱۰۶ منډې جوړې کړې او تر پایه یې لوبه وکړه. رحمت شاه ۴۷ او ریاض حسن ۳۵ منډې جوړې کړې.
په درېیمه سیالۍ کې د افغانستان فیلډنګ (ډګرساتنه) ښه وو ځکه چې د بنګلادېش درې لوبغاړي یې د منډې وهلو پرمهال وسوځول او د کوربه هېواد لوبډله یې ډېرو منډو جوړېدو ته پرې نه ښوده.
ټاکل شوې چې دواړه لوبډلې د مارچ پر درېیمه لومړۍ او د مارچ پر پینځمه دویمه ۲۰ اووریزه سیالۍ وکړي.
