د طالبانو د حکومت د بهرنیو چارو سرپرست وزیر امیر خان متقي په مشرۍ پلاوي په دوحه کې د اروپایي ټولنې له استازو سره وکتل.
د فبرورۍ پر ۱۵مه تر ملاقات وروسته، د افغانستان لپاره د اروپایي ټولنې ځانګړي استازي توماس نېکلسن پر ټوېټر ليکلي چې اروپایي ټولنه له اړمنو افغانانو سره پر مرستو ټینګار کوي او د ۵۰۰ مېليونه یورو مرستو پر ژمنې ولاړه ده.
نېکلسن زیاته کړې چې طالب پلاوي ورته ويلي دي چې تر مارچ پورې به د نجونو او هلکانو ټول ښوونځي او همداراز، ټول پوهنتونونه پرانیزي. دمګړۍ په ځينو ولايتونو کې تر شپږم ټولګي وروسته د نجونو ښوونځي بند دي.
طالبانو ويلي ول چې دا ښوونځي به د شرعي چوکاټ تر برابرولو وروسته پرانیزي. دوی د دې شرعي چوکاټ وضاحت نه وو کړی.
خو په افغانستان کې د ګرمو سیمو دولتي پوهنتونونه د فبرورۍ پر دویمه د نجونو پرمخ بیا خلاص شول. د ننګرهار پوهنتون زده کوونکي وايي، اوس نجونه په بېل وخت کې او هلکان جلا زده کړې کوي.
توماس نېکلسن ليکلي چې د مرستو پیسې به د ملګرو ملتونو له لارې پر خوراکي موادو، روغتیا، زده کړو او د ژوند د لومړنیو اړتیاو په برخو کې ولګوي. نوموړي په خپل ټويټ کې لیکلي چې د اروپایي ټولنې او طالبانو پلاوو له یو بل سره ومنله چې مخامخ او انلاین خبرې به ادامه پیدا کړي.
نېکلسن زیاته کړې چې په افغانستان کې په زور د خلکو غیبولو، غيرقانوني نیونو او له ښځو سره د ناسمې رویې په اړه یې هم د طالبانو پلاوي ته خپلې اندېښنې څرګندې کړې. "موږ د همه شموله سیاسي استازيتوب د کمي او په سېسټماټيک ډول د ښځو ترڅنګ د اقلیتونو حقونو نه ورکولو په اړه هم اندېښنې وښودې."
په افغانستان کې په وروستیو میاشتو کې د ښځو په ګډون د یوشمېر فعالانو د ورکېدو رپورټونه خپاره شول. د ملګرو ملتونو په ګډون د بشري حقونو سازمانونو او فعالانو تور پورې کړی چې طالبان هغه کسان نیسي او ورکوي یې. خو طالبانو دا تور رد کړی. البته د طالبانو د حکومت ویاند ذبیح الله مجاهد د فبرورۍ پر درېيمه له مشال راډیو سره په خبرو کې دعوه وکړه چې هغه فعالان اکثر بهر هېوادونو ته د تګ لپاره د ده په خبره، د قضیو جوړولو هڅې کوي.
بلخوا د طالبانو د بهرنیو چارو وزارت د فبرورۍ پر ۱۵مه په یو بیان کې ویلي دي چې دوی له اروپایي ټولنې د زده کړو په برخه کې د همکارۍ غوښتنه کړې ده.
د طالبانو حکومت تر دې مخکې ویلي ول چې د دوحې د غونډې هدف د بشري مرستو جلبول، د افغانستان د کنګل شوې شتمنۍ خلاصول، اقتصادي مسلې او د افغانستان اړوند پر نورو موضوعاتو باندې بحث دی.
طالبانو د اګست په ۱۵مه کابل ته په ننوتو تېر جمهوري او منتخب حکومت چپه کړ او د چارو واګي یې په خپلو لاسونو کې واخیستل. خو لا هم د نړۍ هېڅ هېواد د دوی حکومت په رسميت نه دی پېژندلی. نړیوالو له طالبانو غوښتې چې د ښځو د زده کړو او حقونو د ورکړې تر څنګ د بيان ازادي یقيني کړي.
