چارواکي وايي، د بلوچستان د پښتون مېشته ضلعې پښین له خانوزیو سره نېږدې په ګوال سیمه کې په ټرافیکي پېښه کې پینځه کسان وژل شوي او یو ژوبل دی.
د خانوزیو د لېویز ځواک چارواکو مشال راډیو ته وویل چې پېښه د جنورۍ پر ۱۱مه سهار مهال شوې ده. دوی وايي، یو موټر د ګیس سېلېنډرو له ټرالر سره وجنګېد.
دوی وویل چې د درو ښځو په ګډون پینځه واړه وژل شوي د بلوچستان د پولیسو یوه افسر مختیار حسین د کورنۍ غړي دي.
دوی زیاتوي چې په پېښه کې د ټرالر (لارۍ) ډرېور ژوبل شوی دی او دا چې لومړنۍ پلټنې ښيي چې ښايي پېښه د باران له وجې شوې وي.
تر دې مخکې په بلوچستان کې د قدرتي افتونو پر وړاندې د مبارزې صوبايي ادارې (پي ډي اېم اې) په یوه بیان کې مساپرو ته خبرداری ورکړی وو او ورته یې په یخو سیمو کې د ورښتونو پر مهال د سفر پر مهال د احتیاط سپارښتنه کړې وه.
دا په داسې حال کې ده چې د جنورۍ پر اتمه د بلوچستان په کلا سیف الله کې د یو مساپر وړونکي بس او ټرک په ټکر کې لږترلږه شپږ کسان ووژل او ۲۸ ژوبل شول.
تر دې وړاندې هم د بلوچستان له مرکز کوټې څخه د سیند د کراچۍ، د خیبر پښتونخوا د ډېره اسماعیل خان او د پنجاب د ډېره غازي خان پر لوري پر غځېدلیو یوشمېر خونړۍ ټرافیکي پېښې شوې دي.
د ۲۰۲۲ز کال د جون پر اتمه نېټه هم د کلا سیف الله په اخترزیو سیمه کې په یو ټرافیکي پېښه کې لږترلږه ۲۲ کسان وژل شوي چې پکې نهه تنه د یوې کورنۍ وو.
بلوچستان د پاکستان تر ټولو لویه صوبه ده چې اوږدې لاري لري خو په ځانګړې توګه نورو صوبو ته غځېدلې لارې د نورو صوبو په څېر پراخې او دوه رویه نه دي چې له کبله یې د خلکو په وینا، داسې خونړۍ پېښې کېږي.
له بلوچستان پرته د پاکستان په نورو برخو کې هم وخت په وخت ټرافیکي پېښې د خلکو د مرګژوبلې لامل کېږي.
پاکستان کې پخوانۍ ټرافیکي پېښې
د ۲۰۲۲ز کال د ډېسېمبر پر څلورمه د خیبر په تورخم کې یو بار وړونکې لارې له ګاډو سره وجنګېده چې پکې دوه تنه ووژل او اووه ژوبل شول.
تر دې مخکې په نومبر کې د سیند صوبې په سېهون کې یوې کندې ته د مساپرو د بس پرېوتو په پېښه کې د ښځو او ماشومانو په ګډون ۲۰ کسان ووژل شول او ۱۳ ټپي شول.
د اکتوبر پر ۱۸مه د خیبر پښتونخوا په کورمه کې په دوو ټرافیکي پېښو کې ۲۹ زده کوونکي ژوبل شوي ول. تر دې شاوخوا یوه اوونۍ مخکې د اکتوبر پر ۱۲مه شپې ناوخته د کراچۍ او حیدراباد ترمینځ په نوري اباد سیمه کې په بس کې د اورلګېدو له وجې ۱۸ مساپر مړه شوي ول.
په اګست کې د پاکستان تر انتظام لاندې کشمیر کې د امنیتي ځواکونو یو ګاډی خوړ ته پرېوت چې پکې نهه سرتېري ووژل شول.
په جولای کې د خیبر پښتونخوا په سوات او ډېره اسماعیل خان کې په دوو ټرافیکي پېښو کې ۱۳ کسان وژل شوي او ۱۶ ټپي شوي ول. تر دې ۱۰ ورځې مخکې د خیبر پښتونخوا په ډېره اسماعیل خان کې په ټرافیکي پېښه کې ۲۰ کسان ووژل او نهه کسان ژوبل شول.
د جون پر اتمه، د بلوچستان په کلا سیف الله کې په یوه ټرافیکي پېښه کې ۲۲ کسان ووژل شول او یو ماشوم ژوبل شو. د مې ۱۲مې پر سهار د پنجاب د حافظ اباد په کوټ لدا کې دوه مساپر وړونکي ګاډي له یو بل سره وجنګېدل چې پکې د یوې کورنۍ د ۱۱ غړو په ګډون۱۲ کسان ووژل شول.
اخوا په خيبر ضلع کې د مرستندویه او ژغورنې چارو اداره (رېسکیو ۱۱۲۲) ویلي ول چې د اپرېل له پیل راهیسې د مې د لومړۍ اوونۍ تر پای پورې په لسګونه ټرافیکي پېښو کې ۱۲ کسان وژل شوي او تر ۹۰ زیات ژوبل شوي ول.
د ۲۰۲۲ز کال د فبرورۍ پر ۲۵مه د بلوچستان یو ملتپاله سیاستوال ډاکتر عبدالحی بلوڅ په پنجاب کې په یوه ټرافیکي پېښه کې ووژل شو.
همداراز د ۲۰۲۱ز کال په اګست کې د پنجاب په ګوجراوالې ښار کې په ټرافیکي پېښه کې نهه کسان ووژل شول. همداراز، په جولای کې په بلوچستان کې پر سړک د مساپر وړونکي بس او موټر په ټکر کې پینځه کسان ووژل شول. تر دې یوه میاشت مخکې، د جون پر ۱۱مه هم د بلوچستان په وډ کې د یوه مساپر وړونکي بس اوښتو په پېښه کې ۲۳ کسان وژل شوي او ۵۰ ژوبل شوي ول.
په پاکستان کې ټرافیکي پېښې اکثر د ډرېورانو بې احتیاطۍ، د قوانینو نه عملي کېدو، د سړکونو خرابوالي او همداراز پر ټاکلي وخت د ګاډو مرمت او معاینې نه کولو له وجې کېږي چې پکې ګڼو کسانو ته مرګ ژوبله اوړي.
