وزیرستان دې له هر ډول وسله والو صفا شي. ارباب مجیب الرحمن
پښتونخوا ملي عوامي ګوند غوښتنه کړې چې په روانو پوځي عملیاتو کې دې شمالي وزیرستان له هر ډول وسله والو ډلو ټپلو پاک وګرځول شي. په خېبر پښتونخوا کې د ګوند صوبايي جنرل سیکرېټري ارباب مجیب الرحمن په پېښور پرېس کلب کې خبريالانو ته وویل، چې له عملیاتو وروسته د وزیرستان ولس خپلو سیمو ته ستنېږي نو پکار ده چې هلته د هېڅ یو یا بلې ډلې وسله وال موجود نه وي. نوموړي وویل، چې د وزیرستان کډوالو لپاره دې سم انتظامات وشي. او له هغوی سره د مرستو لپاره دې نړۍ ته غږ وکړل شي. د غلام غوث راپور