د بلخ ولایت چارواکي وایي چې د هند پر قونسلګرۍ ډله ييز حمله لاهم روانه ده او تر اوسه یې نهه ټپيان روغتون ته لېږدولي دي.
د والي ویاند منیر احمد فرهاد رسنیو ته وویل چې په ټپیانو کې اووه افغان سرتېري او دوه ولسي کسان دي.
نوموړي وویل چې د حمله کوونکو شمېر شپږ تنه دي چې له یوه کوره د هند پر قونسلګرۍ ډزې کوي.
راپورنه وايي چې په پیل کې بریدګرو د هند قونسلګرۍ مخې ته یو څو زورورې چاودنې وکړې او له هغه پس یې د مزارشریف د څلورمې حوزې په څنډو کې د افغان امنیتي ځواکونو سره وسله واله جګړه پیل کړه.
د بلخ امنیت امر عبدالرزاق قادري ازادي راډیو سره په خبرو کې وویل چې وسله والو بریدګرو د هند قونسلګرۍ ته څېرمه د جنبش حزب د یوه پیاوړي غړي سید نورالله سادات پر کور حمله کړې ده.
خو د بلخ سرپرست والي ویاند منیر احمد فرهاد رسنیو ته وویل، چې وسله وال لومړۍ د سید نورالله په کور کې ځای پرځای شوي او له هغه ځایه یې د هند پر قونسلګرۍ د سپکو او درنو وسلو ډزې پیل کړې.
د بلخ ولایتي شورا مشر بیا وايي چې امنیتي چارواکي ورسره د پېښې په اړه دقیق معلومات نه شریک کوي او نوموړی هم دا حمله د سید نوالله په کور ګني.
هغه یې په اړه داسې وویل:
"وسله وال د سید نورالله په نامه د حزب جنبش د یوه غړي کورته ور ننوتي او له هغه ځایه د افغان امنیتي ځواکونو سره جګړه کوي."
څه باندې پنځه ساعته د حملې له پیله اوړي خو لا هم د سیمې څخه د سپکو او درنو وسلو د غږ سربېره د زورورو چاودنو غږ هم اورېدل کیږي.
تر دمه د یادې پېښې مسوولیت د افغان دولت هېڅ یوې مخالفې ډلې نه دی منلی.
په داسې حال کې په بلخ کې د هند پر قونسلګرۍ وسله وال برید ترسره کیږي چې د هند د پنجاب په پټانکوټ کې د وسله والو له یوه ډله ییز بریده پس د ډيلي او اسلام اباد ترمنځ سیاسي اړیکې بیا کړکېچنې شوي دي.
د وروستیو مالوماتو له مخې نن د دوشنبې ورځ د هند هوايي اډې ته د ننوتیو وسله والو له ډلې دوه تنه لا هم له امنیتي ځواکونو سره په نښته بوخت دي.
د یادولو ده چې تر دې دمخه هم په کراتو کراتو د پاکستان هېواد پخوانیو چارواکو په وضاحت سره په افغانستان کې د افغان دولت له لوري د هند د ځینو ډپیلوماتیکو څانګو د بندولو غوښتنه مطرح کړې ده.
مجیب الرحمن حبیبزی
