د کوټې د پولیسو مشر سید امتياز شاه وايي ، ځانمرګي بریدګر د کوټې له کچارۍ او لیاقت پارک سره نژدې د پاکستاني ملېشه ځواک ټرک ډوله موټر په نخښه کړی.
د سید امتياز شاه په وینا، په ژوبل شويو کې هم د ملېشه ځواک سرتېري شامل دي.
يوه عيني شاهد ترپېښې وروسته رسنيو ته په خبرو کې وویل، ځانمرګی بریدګر په يوه بایسيکل سپور وو او تر چاودنې مخکې يې د ملېشه ځواک له دې ټرک موټر سره ځان وجنګاوو.
چاودنه دومره زوروره وه، چې ږغ يې د ښار په بېلا بېلو سیمو کې اورېدل شوی دی او تر ډېره لرې يې د ودانيو شيشې ماتي کړې.
چارواکي وايي، په ژوبل شويو کې مېرمنې او ماشومان هم دي.
د بلوچستان حکومت ویاند انوارالحق کاکړ د پېښې په ځای کې له مشال راډيو سره په خبرو کې وويل، د دې برید هدف يوازې ملېشه ځواک نه بلکې د پاکستان ریاست دی.
نوموړي وویل، د دې غچ به له وسله والو څخه اخلي. هغه زیاته کړه چېکاکړ زیاتوي، تر ضرب عضب عملياتو وروسته ترهګر په تېښته دي او د دوی ځواکونه به يې نور هم وځپي.
په دغه ځانمرګي برید کې اکثره وژل شوي او ټپيان ولسي وګړي دي چې د برید پر وخت له همدې ځای څخه تېرېدل.
د پاکستانۍ ملېشه و له دې ټرک سره سره د دوی يو بل ډاټسن ډوله موټر او د درې عامې موټرې او يوه رکشه هم تباه شوې ده.
محمد خراساني چې ځان د پاکساني وسله والو طالبانو ویاند بولي مشال راډیو ته په لېږلي لیک کې د دې پېښې زمه واري منلې ده.
