اجون خان: زوی مي په ګوليو سوری شو خو رياست يې وجه نه را ښيي.
د ۲۰۱۴ م کال په ۱۶م ډیسېمبر پر پېښور ارمي پبلک سکول په وسله وال بريد کې د وژل شویو ماشومانو ۲۳ ميندو د نهې په ورځ په پېښور های کورټ کې د پېښې د عدالتي څېړنو لپاره درخواست جمع کړ. دا چې د وژل شوو ماشومانو کورنی ولې د عدالتي کميشن د جوړېدو غوښتنه کوي؟ حکومت ولې له عدالتي تحقيقاتو ډډه کوي؟ دا پوښتنې د مشال تر رڼا لاندې بحث کې څېړل شوې دي. د بحث مېلمانه د ارمي پبلک سکول شهدا فورم جنرل سيکرټري او د هايي کورټ وکيل اجون خان چې زوی اسفند خان يې په دې پېښه کې له لاسه ورکړی دی او خبريال وسيم احمد شاه چې د عدالتي او بشري حقونو په اړه رپورټونه او څېړنې کوي دي. په بحث کې د خيبر پښتونخوا د محصولاتو وزير امين ګنډه پور او د ارمي پبلک سکول په پېښه کې د وژل شوو دوو ماشومانو د مور مرکې هم شاملي دي. کوربه عبدالحی کاکړ دی.