د ترکيې پوځ د سېشنبې په ورځ په یوه اعلامیه کې وویل، د عراق په سنجار سیمه کې يې د کردانو د کارګر ګوند او د سوريې په شمال ختیځ کې يې د «وای. جي. پي» په نامه د کرد وسلهوالو سنګرونه ویشتلي دي.
ترکیه، متحده ایالات او اروپايي ټولنه د کردانو کارګر ګوند یا «پې. کې. کې» یوه ترورېستي ډله ګڼي.
د کردانو کارګر ګوند وسلهوالو د عراق په سنجار سیمه کې تر هغه وروسته خپل شتون او خپلې کاروايانې پراخې کړې چې دغلته يې د داعش لهخوا د یزیدي اقلیت پر وړاندې د زور زیاتي د مخنیوي لپاره ځانونه ورسول.
داعش د ۲۰۱۴ میلادي کال په اوړي په سنجار کې د مېشتو یزیدیانو پر ضد له تاوتریخوالي او زرو زیاتي کار واخېست.
د ترکيې پوځ یوه لوړ رتبه قوماندان جنرال سیمي بوسالي ویلي په سنجار سیمې د دوی په هوايي برید کې د کردانو پېشمرګه ملېشه ځواک پنځه وسلهوال وژل شوي دي.
د ازادي رادیو د خبر مرکزي څانګې په وینا دا لومړی ځل دی چې ترکیه د عراق په سنجار سیمه کې پر کرد وسلهوالو برید کوي.
د ترکيې پوځ په تازه بمبارۍ کې د کرد وسلهوالو یوه بله ډله «وای. جي. پي» هم په نښه کړې ده.
متحده ایالات له «وای. جي. پي» یا د کردانو ډموکراتیک ځواک ملاتړ کوي او دا ډله د شام په شمال کې د داعش پرضد جګړه کې مخکښ ځمکنی ځواک ګڼل کېږي.
د شام بشري حقونو ډله چې له لندنه فعالیت کوي وايي د ترکيې هوايي برید په نتیجه کې د «وای. جي. پي» وسلهوالو درې غړي وژل شوي دي.
د کرد وسلهوالو «وای. جي. پي» ډلې په یوه بیان کې ویلي ترکيو الوتکو د دوی یوه راډیو او مخابراتي او پوځي اسانتیاوې په نښه کړي دي.
