په داسې حال کې چې له تېرو څو ورځو راهیسې په کابل کې يو شمېر کسانو د افغانستان د اوسني نظام په خلاف خېمې لګولي او د لوړ پوړو دولتي چارواکو د استفا غوښتنه کوي، په ننګرهار کې د مشرقي ولایتونو ولسونو د نظام د ملاتړ او د قومونو د يووالي تر عنوان لاندې يوه غونډه رابللې وه چې ګردو يې له نظام نه د ملاتړ غږ پورته کړ.
د قومونو د یووالي او له نظام ملاتړ دغه غونډه د شنبې په ورځ د ننګرهار د سرحدنو او قبایلو چارو ریاست په انګړ کې تر سره شوه چې د مشرقي ولایتونو د بېلابېلو قومونو استازو، دیني عالمانو، مدني فعالانو او ځوانانو په کې ګډون کړی و.
په ننګرهار کې د قومونو د یووالي شورا یو تن غړي احسان الله کاموال په حکومت غږ وکړ چې هيچا ته وخت ورنه کړي چې د هېواد ثبات او راتلونکی له ګواښ سره مخ کړي:
« موږ مشرقیوال د اوسني حکومت په چارواکو غږ کوو چې د شرخوښو او سولې ضد عناصرو، لخوا راپیدا شوی کړکېچ ژر تر ژره په جدي توګه پای ته ورسوي او هيچا ته اجازه ورنه کړي چې د هېواد امنیت او سياسي ثبات له ګډوډۍ سره مخ کړي.»
د ننګرهار ولایتي شورا مرستیال لعل محمد دراني وویل، هر هغه څوک چې د پېښې غندنه کوي، د حکومت پر ځای دې د پېښې عاملین وغندي:
« که دا اوس هم د کابل د پېښې د شهيدانو لست له اولې ورځې نه راواخلئ، شايد تر نورو قومونو په کې پښتانه ډېر وي. خو ټول افغانان سره ورونه دي، موږ د پېښې غندنه کوو، خو که څوک راپاڅېږي، د هغو خلکو خلاف دي غږ اوچت کړي چې د پېښې عاملين دي.»
د لغمان د ولایتي شورا منشی ګلزار سنګروال په خپلو خبرو کې وویل، په افغانستان کې موجوده نظام د ملت په قربانيو لاسته راغلی او دوی به هيچا ته اجازه ورنه کړي چې د نظام پر وړاندې خنډونه رامنځته کړي:
«اوس چې په کابل کې کوم کشمکش روان دی، خيمې وهل شوي دي، له دغو خېمو او کشمکش نه د قوم پرستۍ او تعصب بوی راځي، دا نظام د دې ملت د قربانيو په نتیجه کې رامنځته شوی دی. او ستاسو د دغو خېمو وهلو او دغه کشمکش نه دتعصب بوی راځي، پړه او ملامتیا به يې هم ستاسو په غاړه وي.»
په غونډه کې يو پريکړه لیک هم ولوستل شو چې په يوه ماده کې يې راغلي« هغوی چې د نظام په خلاف يې خېمې درولي، تر شاه يې د يو شمېر هغو کړيو لاسونه دي چې د خپلو اهدافو لپاره زموږ هېودوال په يوه او بل نوم سره تاوتريخوالي ته هڅوي. خو د مشرقي ولسونه به هيچا ته اجازه ورنه کړي چې د افغانستان ثبات ته زیان ورسوي.»
