د یادې انتظامې له خوا په خپره شوې خبرپاڼه کې ویل شوي چې د تورخم په باچا مینه کې د سرکاري او شخصي سکولونو افغان زده کوونکو او کسټم کلیرنګ ایجنټانو ته به د دوي په وینا ، تر پوله د اوښتو لپاره ځانګړي کارډونه ورکول کېږي.
خبرپاڼه زیاتوي چې یاد زده کوونکي او کسټم کلیرنګ ایجنټان دې د جولايي پر ۱۰ مه نېټه په تورخم کې د نادرا دفتر ته د ځان ثبت کولو لپاره ورشي.
پر تورخم د تلو راتلو لپاره دا ځانګړي کارډونه به یوازې هغو افغان زده کوونکو ته ورکول کېږي چې په باچا مېنه کې د سکول د پرنسپل یا مشر ښوونکي له خوا ثبوت ورسره وي.
خبرپاڼه زیاتوي چې کسټم کلیرنګ ایجنټان باید په تورخم کې د کسټم دفتر تصدیق نامه ولري.
د یادونې وړ ده چې پاکستان له تېر څه باندې یوه کاله راهسې افغانستان ته پر تلونکو لارو نه یوازې د ویزې شرط لګولی دی بلکې په عامه توګه هم خلک په تلو راتلو کې له سختۍ سر ټکوي.
