بلوچستان های کورټ د بلوڅ قبایلي مشرنواب اکبرخان بګټي د وژنې په تور د پاکستان پخوانی پوځي صدر جنرال پروېز مشرف پرضد درخواست رد کړی او هغه یې په دغه مقدمه کې بري کړی دی.
عدالت دا پرېکړه د چهار شنبې ورځ د نواب اکبرخان بګټي د زوی نوابزاده جمیل اکبر بګټي له خوا پر درخواست کړې.
جمیل بګټي په خپل درخواست کې په کوټه کې د ترهګرۍ ضد یوه عدالت هغه پرېکړه چېلنج کړې وه چېد۲۰۱۶م کال د جنورۍ میاستې په ۱۸ لسمه نېټه جنرال پروېز مشرف، آفتاب احمد خان شېرپاو اومیر شعیب نوشېرواني یې بري کړي ول.
د بلوچستان های کورټ جج جسټس جمال خان مندوخیل او جسټس نذیر لانګو په خپله لنډه پرېکړه کې د جمیل اکبر بګټي درخواست ردکړ.
له خبریالانو سره په خبرو کې د جمیل اکبر بګټي وکیل سهېل راجپوت ایډوکېټ پر عدالي پرېکړه ناامېدي وښودله او ویې ویل چې اوس به سپریم کورټ ته درومي.
د یادلو ده چې د پخواني دیکتاتور جنرال پروېز مشرف په واکمنۍ کې په بلوچستان کې د پوځي عملیاتو پر مهال بلوڅ مشر نواب اکبرخان بګټي په ۲۰۰۶ کال د اګست په ۲۶مه نېټه د ډېره بګټي او کوهلو ترمنځ د ترتانې په غرني سیمه کې له خپلو ملګرو سره وژل شوی وو.
د نواب بګټي زوی جمیل اکبر بګټي د خپل پلار د وژنې ذمه واري پر جنرال پروېز مشرف، پخواني لومړي وزیر شوکت عزیز، د پاکستان کورنيو چارو پر پخواني وزیر آفتاب احمد خان شیرپاو، د بلوچستان پر پخواني ګورنر اوېس احمد غني او د بلوچستان کورنيو چارو پخواني وزیر میر شعیب نوشیرواني واچوله او د دوی پرضد یې مقدمه لاسلیک کړه.
