کوګلمېن: د پاکستان په اړه د امريکايي کانګرس رويه تنده شوې
د امريکا حکومت پاکستان ته تر هغو پورې د پوځي مرستو ځنډولو اعلان کړی چې اسلام اباد د ترهګرۍ ضد جګړه په تېره بيا د افغان طالبانو او حقاني شبکې خلاف پرېکنده اقدامات نه وي کړي. خو د پاکستان د بهرنيو چارو وزارت بيا ويلي چې د امریکا دا پرېکړه به له وخت سره پر مشترکه اهدافو خپل اغېز پرېږدي. د پاکستان او امريکا ترمنځ مخ په خرابېدونکيو اړيکو ته په پام سره د مشال راډیو مدير داود خټک د امريکا د ولسن انسټيټيوټ په نامه څېړنيزې ادارې له يوه څېړونکي مايکل کوګلمېن سره مرکه کړې ده. کوګلمېن د پاکستان، افغانستان، هند او بنګله دېش پر حالاتو نظر ساتي او په دې اړه څېړنې او ليکنې کوي.