په بلوچستان کې د سردار ثناءالله زهري د وزيراعلی له څوکۍ تر استعفا ورکولو وروسته د نوي کانديد لپاره هلې ځلې تېزې شوې دي.
نوموړي د سېشنبې په ورځ له هغه وروسته استعفا ورکړه چې په ګوند مسلم ليګ کې يې د اسمبلۍ ځېنو غړيو بغاوت وکړ.
د نوموړي پرضد په اسمبلۍ کې د نه اعتماد قرارداد راوړل شو خو ثناءالله زهري تر دې له مخه استعفا وکړه.
داوخت مسلم ليګ ن د وزيراعلی لپاره د نوي کانديد پر ټاکلو بحثونه کوي.
ددې ترڅنګ اتحادي ګوندونه پښتونخوا ملي عوامي پارټۍ او نېشنل ګوند هم پر خپله تګلاره کار کوي.
پوښتنه دا ده چې په بلوچستان کې ممکنه سياسي منظرنامه څه کېدلی شي؟
دا او نورې پوښتنې د مشال تر رڼا لاندې بحث کې څېړل شوې دي.
په صوباي اسمبلۍ کې د پښتونخوا ملي عوامي پارټۍ غړی او پخوانی وزير عبدالله بابت، د جميت علما اسلام فضل الرحمن ډلې د اسمبلۍ غړی حاجي عبدالمالک کاکړ، د مسلم ليګ نواز ډلې بلوچستان وياند جان محمد اڅکزی او خبريال سيد علي شاه د بحث ميلمانه دي.
