کابل ـ افغان چارواکي وايي، د کابل ښار صدارت څلور لارې د شنبې ورځې په برید کې د وژلو شویو کسانو شمیر ۱۰۳ تنو ته ورسېد.
د کورنیو چارو وزیر ویس احمد برمک د یکشنبې پر ورځ په کابل کې خبري کنفرانس ته وویل چې پدې برید کې ۲۳۵ تنه نور ټپیان شوي دي.
له بلې خوا د افغانستان د عامې روغتیا وزارت وايي، د ځينو جسدونو هویت لا تر اوسه مشخص شوی ندی او عدلیي طب پدې برخه کې کار کوي.
بل پلو د یکشنبې پر ورځ له ارګه په خپره شوې یوه خبر پاڼه کې ویل شوي چې طالبان، حقاني شبکه، داعش او د دوی ملاتړي د اسلام او بشریت دښمنان دي او دوی په تېرو څو ورځو کې په کابل، جلال اباد او کندهار کې د وحشیانه تروریستي بریدونو په ترسره کولو د سلګونو افغانانو ژوند اخېستی دی.
له ارګه خپره شوې خبر پاڼه وايي، د افغانستان اسلامي جمهوریت د یکشنبې په ورځ ملي ماتم کوي څو د پېښې د قربانیانو او د هغوی د کورنیو سره خواخوږي ښکاره کړل شي. حکومت همدا رنګه د دوشنبې په ورځ په کابل کې عامه رخصتي هم اعلان کړې ده.
د راپورونو له مخې، دغه برید چې مسوولیت یې وسله والو طالبانو منلی تر ډيره قربانیان يي ملکیان دي.
