پاکستان پېپلز ګوند او عوامي نېشنل پارټۍ په جلا جلا غونډو کې د فاټا اصلاحاتو د ژر تر ژره عملي کولو غوښتنه کړې ده.
د يکشنبې په ورځ په پېښور کې د باچا خان او ولي خان د تلين جلسې ته د وينا پر مهال د عوامي نېشنل ګوند مشر اسفند يار خان ولي وويل چې بايد تر راتلونکيو ټولټاکنو له مخه د خېبر پښتونخوا په اسمبلۍ کې د قبايلي سيمو څوکۍ مالومي کړل شي.
نوموړي زياته کړه چې بايد د يوه اييني ترميم له مخې د خېبر پښتونخوا په کابينه کې د فاټا د وزيرانو شمېر هم وټاکل شي.
بايد د يوه ايیني ترميم له مخې د خېبر پښتونخوا په کابينه کې د فاټا د وزيرانو شمېر هم وټاکل شي. اسفنديار ولي خان
بل خوا هم د يکشنبې په ورځ په اسلام اباد کې د پاکستان پېپلز ګوند شريک مشر اصف علي زرداري په مشرۍ کې غونډه وشوه چې پکې د خېبر پښتونخوا په تيره بيا پر فاټا اصلاحاتو بحث وشو.
اصف علي زرداري غونډې ته وويل چې دوی د قبايلي سيمو په خېبر پښتونخوا کې د ورګډلو ملاتړ کوي.
نوموړي غوښتنه وکړه چې بايد د سپريم کورټ او پېښور هاي کورټ واک و اختيار ژر تر ژره فاټا ته و غځول شي.
د پېپلز ګوند د خېبر پښتونخوا جنرل سيکريټيري فيصل کريم کُنډي د يکشنبې ماښام مشال راډیو ته وويل چې د دوی ګوند هڅه کوي چې نور ګوندونه و هڅوي چې له سېنېټ څخه د سپريم کورټ او پېښور های کورټ واک قبايلي سيمو ته د غځولو قانون منظور کړي.
پښتونخوا ملي عوامي ګوند او جميعت علما اسلام(ف) دا غوښتنه کوي چې د اصلاحاتو په اړه دې د قبايلي سيمو د خلکو د خوښې مالومو لپاره رېفرنډم وشي.
د پاکستان قامي اسمبلۍ د جنورۍ پر ۱۲ مه د سپريم کورټ او پېښور های کورټ دايره اختيار تر فاټا د غځولو قانون منظور کړی وو.
دا د فاټا اصلاحاتي رپورټ د يوشمېر سپارښتونو برخه ده.
که څه د پاکستان يو شمېر ګوندونه د فاټا اصلاحاتي رپورټ ملاتړي دي خو پښتونخوا ملي عوامي پارټۍ او جميعت علما اسلام(ف) دا غوښتنه کوي چې د اصلاحاتو په اړه دې د قبايلي سيمو د خلکو د خوښې مالومو لپاره رېفرنډم وشي.
