- لیکوال/لیکواله اسرار عالم مومند
لویو پاکستانیو ګوندونو انتخاباتي نتیجې رد کړې
پراګ - په پاکستان کې د مسلم لیګ (ن)، پیپلز ګوند او متحده مجلس عمل مشرانو د جولای پر ۲۵مه د شویو انتخاباتو نتیجې رد کړې دي.
له لومړنیو، نارسمي او غیر حتمي نتیجو سره سم، د پاکستان تحریک انصاف ګوند د قامي اسمبلۍ زیاتې څوکۍ تر لاسه کړې دي.
د جولای پر ۲۵مه شپې ناوخته د مسلم لیګ (ن) مشر میا شهباز شریف خبري غونډې ته وویل، په ټول سیاسي ژوند کې یې داسې ډاروونکی حالت نه وو لیدلی.
ده وویل: “له یو شمېر سیمو څخه راته شکایتونه راغلل چې زموږ د ووټونو اېجنټان له مرکزونو ایستل شوي ول. له ما سره ویډیوګانې دي چې په ملتان کې زموږ ښځینه کارکوونکو ژړل چې موږ وبښئ.”
شریف زیاته کړه چې په لاهور، راجنپور، خیبر پښتونخوا او یو شمېر نورو سیمو کې یې له ګوندي غړو سره ناروا چلند وشو.
د پیپلز ګوند یوه مشر او سېنېټر میا رضا رباني هم د شپې مهال خبریالانو ته په وینا کې ورته خبره وکړه.
له ما سره ویډیوګانې دي چې په ملتان کې زموږ ښځینه کارکوونکو ژړل چې موږ وبښئ.شهباز شریف
ده تور پورې کړ چې انتخاباتي کمېشن او نګران حکومت د رڼو ټاکنو په کولو کې ناکامه شول.
“موږ پر دې نتیجو اندېښنې لرو. د پاکستان پیپلز ګوند پولېنګ اېجنټان د رایې ورکولو له مرکزونو ایستل شوي ول.”
رباني وویل، دا ډول انتخابات به خطرناکې پایلې ولري.
هلته د متحده مجلس عمل په نوم د مذهبي ګوندونو اتحاد یوه مشر مولانا فضل الرحمان هم تور پورې کړ چې په ټاکنو کې درغلي شوې او ویې ویل چې پر دې موضوع به ژر ټولګوندیزه غونډه وروغواړي.
خو د پاکستان تحریک انصاف یوه مشر شاه محمود قریشي د ټولو سیاستوالانو تورونه رد کړل او ویې ویل چې ګوند یې د عمران خان په مشرۍ لوړ مقام ته ورسېد.
- لیکوال/لیکواله پامیر ساحل
انتخاباتي نتیجې: پاکستان تحریک انصاف مخکې دی
- اسوشي اېټډ پرېس اژانس او پاکستانۍ رسنۍ وايي، لومړۍ نارسمي نتیجې ښيي چې پاکستان تحریک انصاف ګوند د قامي اسمبلۍ ډېرې څوکۍ ګټلې دي.
- د جولای پر ۲۵مه، میلیونونه خلکو د قامي اسمبلۍ ۲۷۲ څوکیو لپاره رایې واچولې. هر ګوند چې له دې څخه ۱۳۷ څوکۍ وګټي هغه وفاقي حکومت جوړولای شي.
- له دې علاوه د قامي اسمبلۍ ۶۰ څوکۍ د ښځو او ۱۰ یې د لږکیو لپاره ځانګړې دي. پر دې څوکیو خلک رایه نه اچوي بلکې هر ګوند چې څومره زیاتې څوکۍ ګټي، هومره زیاتې ځانګړې څوکۍ تر لاسه کوي.
- لومړني اټکلونه ښيي چې د عمران خان ګوند ښايي څه د پاسه ۱۰۲ څوکۍ وګټي.
- رسنۍ وايي، مسلم لیګ (ن) د قامي اسمبلۍ پر ۶۶ او پیپلز ګوند پر ۳۹ حلقو مخکې وو.
انتخاباتي نتیجې: پاکستان تحریک انصاف مخکې دی @PTIofficial is leading in the polls, unofficial results show… https://t.co/4sWLVa5t7j
— Mashaal Radio (@Mashaalradio) ۲۶.۷.۲۰۱۸
- لیکوال/لیکواله عمر وزیر
د شمالي وزیرستان د ۴۸مې حلقې نارسمي، غیر حتمي نتیجه
محسن داوړ (ازاد نوماند): ۱۵،۶۰۸ ووټونه
مصباح الدین (اېم اېم اې): ۱۳،۱۵۰ ووټونه
اورنګزېب (پي ټي ای): ۸،۶۸۶ رایې