د افغانستان بهرنيو چارو وزير خپل پاکستاني سيال ته باور ورکړی چې په جلال اباد کې د پاکستانۍ کونسلګرۍ د امنيت پرسر راپورته شوې لانجه کې به ژر مثبت پرمختګ وشي.
د پاکستان خارجه وزارت نن په خبر پاڼه کې ويلي چې صلاح الدين رباني و شاه محمود قريشي ته ټيليفون وکړ او هغه ته يې د پاکستان بهرنيو چارو وزير پر جوړېدو مبارکي وويله.
بيان زياتوي چې دواړو مشرانو د پاکستان او افغانستان د تعلقاتو پر مختلفو اړخونو خبرې وکړې چې پکې په جلال اباد کې د پاکستان کونسلګرۍ د امنيت موضوع هم شامله وه.
شاه محمود قريشي غوښتنه وکړه چې افغان حکومت به د کونسلګرۍ د امنيت لپاره هغه پلان بحال کړي چې د سږکال اګست تر ۲۸ پورې پرځای وو. بيان زياتوي چې صلاح الدين رباني په دې برخه کې د مثبت پرمختګ ډاډ ورکړ.
دوی پر دې خبره هم سره سلا شول چې د دواړو هېوادونو ترمنځ د ګډ عملي پلان د مېکېنزم بله غونډه به په اسلام اباد کې کېږي.
