د کندهار مرستیال والي حاجي اغا لالي دستګیري د اکتوبر پر ۲۶مه مشال راډیو ته وویل چې دوی د انتخاباتو د امنیت په برخه کې ډاډه دي.
د انتخاباتو د خپلواک کمیسیون ویاند سید حفیظ الله هاشمي هم مشال راډیو ته ويلي چې د کندهار شاوخوا ۵۶۰۰۰۰ رجسټر شوي کسان به په ۱۷۳ مرکزونو کې رایې ورکړي.
د یادې ادارې د چارواکو په وینا ، له کندهاره د ښځو په ګډون ۱۱۲ کسان د ولسي جرګې انتخاباتو لپاره کاندیدان دي.
په دغه سیمه کې د ولسي جرګې انتخابات د کندهار د پخواني امنیه قوماندان جنرال عبدالرازق او د استخباراتو د مشر عبدالمومن حسین خیل د وژل کېدو له پېښې وروسته د يوې اوونۍ لپاره وځنډېدل.
په افغانستان کې د ولسي جرګې انتخابات د اکتوبر پر شلمه له کندهار او غزني پرته د هېواد په ۳۲ ولایتونو کې وشول.
د افغانستان د ولسي جرګې په ټاکنو کې نېږدې نهه میلیونه د رایې ورکولو په شرایطو برابر افغانانو نومونه ثبت کړي ول.
د افغانستان د ټاکنو خپلواک کمېسیون وايي، د انتخاباتو وروستۍ پایلې په ډېسېمبر کې اعلانېږي.
د افغانستان ولسي جرګه ۲۵۰ چوکۍ لري. سږکال ولسي جرګې ته تر ۲۵۰۰ زیات کاندیدان ولاړ ول.
