د امریکا ولسمشر جو بايډن په برما کې د پوځ لخوا د طاقت کارولو او لږ تر لږه ۹۰ کسانو د وژنې غندنه کړې ده.
ولسمشر جوبایډن د مارچ پر ۲۸مه په واشنګټن کې خبریالانو ته وویل چې د رارسیدليو مالوماتو له مخې د دومره خلکو وژنه یو غير ضروري، ويرونکی او وحشيانه عمل دی.
بلخوا اروپايي ټولنې هم د دې تشدد غندنه کړې او دا يې د نه منلو وړ عمل بللی دی.
دا غبرګون له هغه وروسته ده چې د مارچ په ۲۷مه د دولسو هيوادونو پوځي مشرانو په يوه ګډه اعلاميه کې د برما د پوځ لخوا د طاقت کارولو غندنه وکړه.
دوی ویلي وو چې د برما پوځ د خپل ولس په وړاندې باور له لاسه ورکړې
په اعلاميه کې د برما پر پوځ غږ شوی وو چې تشدد بند کړي او د خپل عمل له وجې يې د ولس پر وړاندې کوم احترام او باور بايللی د هغې د بیا بحالۍ لپاره کار وکړي.
دا له هغه وروسته ده چې په برما کې امنيتي ځواکونو د مارچ په ۲۷مه ۹۱ کسان وژلي دي. ځينو سرچينو د مړو شمېر له سلو ډېر ښودلی دی.
دا د دې هېواد د پوځ له خوا د فرورۍ په لومړۍ نېټه، ترکودتا وروسته د روانو مظاهره پر ضد د شوې
کاروايي تر ټولو خونړۍ ورځ وه. په همدغه ورځ د برما پوځ د امنيتي ځواکونو نړيواله ورځ هم لمانځلي.
اروپايي هېوادونو، امريکا او ملګرو ملتونو پر دې وژنو سخته غصه او خفګان ښودلی دی.
ملګرو ملتونو ويلي چې دوی ته د رسېدلو راپورونو ترمخه، د برما په ۴۰ ښارونو کې په سلګونو کسان زخميان شوي او ګڼ نور نيول شوي هم دي.
پوځ د فرورۍ په سر کې د آنګ سان سوچي حکومت ختم کړی وو چې له وجې يې خلکو د ولسي حکومت د بيا بحالۍ لپاره مظاهرې پېل کړي.
