د ملګرو ملتونو امنیت شورا وايي، طالبان لا هم له القاعده شبکې سره اړیکې لري او هېڅ داسې نښه نه شته چې وښيي چې دواړو ډلو دا اړیکې شلولې وي.
د ملګرو ملتونو د امنیت شورا راپور چې د جون پر دویمه خپور شو، د طالبانو او القاعده روابط پر افغانستان سربېره، د امریکا لپاره هم یو ننګونکی ګواښ بولي.
د دې مهم نړیوال سازمان په راپور کې راغلي، د القاعده شبکې مهم مشران د افغانستان او پاکستان ترمنځ سیمو کې ژوند کوي.
په دې راپور کې د القاعده د مشر ایمن الظواهري مړینه هم نه ده تایید شوې.
د طالبانو دریځ
که څه هم طالب ویاند ذبیحالله مجاهد ازادۍ راډیو سره په خبرو کې په خپلو لیکو کې د بهرنیو وسلهوالو شتون رد کړ، خو د ملګرو ملتونو راپور ښيي چې لاهم د دې ډلې په لیکو کې له ۸ تر ۱۰ زره بهرني وسلهوال جګړه کوي.
مجاهد مشال راډیو ته وویل: "اسلامي امارت هېڅ ډول اړیکې له هغه چا سره نه لري چې په افغانستان کې نهشته، خپلو هېوادونو ته تللي دي او د افغانستان په خاوره کې نهشته."
د افغان حکومت دریځ
خو د افغانستان د ملي امنیت شورا بیا وايي، دا روښانه ده چې طالبان او القاعده اړیکې پالي، ځکه دوی له ګډو ګټو سربېره، ایډیالوژیک تړاو لري.
د افغانستان د ملي امنیت شورا دفتر ویاند رحمتالله اندړ مشال راډیو ته وویل، طالبانو ته پر همدې بنسټ، له القاعده پرېکون سخت دی.
له دې وړاندې د امریکا دفاع وزارت، کانګرس، ناټو او ځینو نورو هېوادونو هم طالبان تورن کړي چې القاعده سره یې اړیکې نه دي شلولي.
د امریکا او طالبانو ترمنځ د دوحې لاسلیک شوې هوکړې یوه مهمه موضوع، د القاعده په ګډون له ټولو بهرنیو ترهګرو ډلو سره د اړیکو پرېکون دی، هغه څه چې د ملګرو ملتونو په راپور کې یې ځواب منفي دی.
دا راپور د افغانستان د امنیتي وضعیت په اړه یو اندېښمنونکی تصویر وړاندې کوي او لیکي، د دې هېواد امنیت د تېر بل هر وخت په نسبت خراب او تاوتریخوالی د ۲۰۲۰ز کال د لومړیو ۳ میاشتو پرتله ۶۰ سلنه زیات شوی دی.
په افغانستان کې تاوتریخوالی د ۲۰۲۰ز کال د لومړیو ۳ میاشتو پرتله ۶۰ سلنه زیات شوی دی.راپور
ملګرو ملتونو د امنیت شورا راپور کې طالبان په افغانستان د روانو هدفي وژنو مسوولان بلل شوي او زیاتوي، د دې ډلې یو شمېر مشران په ځانګړي ډول د ملا محمد عمر زوی ملا یعقوب او سراجالدین حقاني سولې ته لېوال نه دي او له نظامي لارې د افغانستان د ستونزې په پای ټینګار کوي.
د ملګرو ملتونو د امنیت شورا راپور طالبان مخ په پراخېدونکې ډله یادوي چې د ولسوالیو او ولایتونو له مرکزونو پرته له ۵۰ تر ۷۰ سلنې خاوره په واک کې لري او یا یې هم د واک خپلولو هڅه کوي.
خو د افغانستان د ملي امنیت شورا دا خبره نه مني.
د دې شورا ویاند رحمتالله اندړ مشال راډیو ته وویل: "طالبانو ته د اقتدار معادله غلطه تشریح شوې. اوس افغانانو د خپل ملي شعور له مخې، د نظام او ارزښتونو په دفاع ولاړ دي. شاتګ، یکهتازي، د نړۍ سره ترېنګلتیا او په ټوله کې تور دوران نه غواړي. دلته یوازې طالبان نه، بلکې هېڅوک هم د جبر حاکمیت نه شي قایمولای."
په افغانستان کې د نشه يي توکو قاچاق
ملګرو ملتونو په راپور کې دغه شان د نشهيي توکو کښت او قاچاق د جګړې د پراخېدو او د طالبانو د مالي ملاتړ ستره سرچینه بلل شوې، خو تر خوا یې د افغانستان په دولتي ادارو کې فساد د بېثباتۍ له دوام سره مرستندویه وسیله یاده شوې.
د ملګرو ملتونو د امنیت شورا د څېړونکو راپور، داعش او په سیمه کې نورې ډلې هم د افغانستان د ثبات لپاره ګواښ بولي او زیاتوي، دې ډلو هم هڅه پیل کړې چې له طالبانو مرور وسلهوال خپلو لیکو ته جذب کړي.
د فېسبوک تبصرې