د سوات تعلیمي بورډ اعلان کړی چې د سوات ضلعې د نهم، لسم او ۱۱م ۱۲م جماعتونو د بورډ امتحانونه به د جولای پر ۱۰مه پیلېږي او دغه به په مخصوصو مضمونونو کې وي.
د سوات د تعلیمي بورډ مشر سید نبي شاه د جون پر ۲۹مه مشال راډیو ته وویل زده کوونکي به په دغو امتحانونو کې درې پرچې ورکوي او د هغې په بنیاد به د دوی حتمي نتیجې اعلانېږي.
د سوات تعلیمي بورډ چارواکي دا هم وایي، دغه امتحانونه به په زړه طریقه وي.
د تعلیمي بورډ د شمېرو ترمخه سږ کال په سوات ضلعه کې د نهم لسم ۹۲ زره زده کوونکي او د ۱۱م ۱۲م جماعتونو تر ۴۵ زرو زیات زده کوونکي به دغه امتحانونه ورکوي.
په خېبر پښتونخوا کې له پینځم څخه تر ۱۴م ټولګي ټولې سرکاري او شخصي تعلیمي ادارې د جون له ۱۷مې څخه بیا پرانېستل شوې وې، د تعلیم محکمې د تعلیم ټولو ضلعې افسرانو ته امر کړی چې د ګرمي له زیاتېدو سره سم دې اقدامات وکړي او له نهمه تر ۱۲م جماعت پورې زده کوونکو ته یوازې هغه مضمونونه ورښيي چې پکې به ترې ازموینه اخیستل کېږي.
