د سیند په مرکز کراچۍ کې میشتو بنګاليانو د پاکستان شناختي کارډ نه ورکول کېدو پرضد احتجاج کړی دی.
دوی د اکتوبر پر ۳۱ مه د کراچۍ پرېس کلب مخې ته په په یوه احتجاجي مظاهره کې غوښتنه کوله چې د پاکستان حکومت دې شناختي کارډونه ورته جاري کړي.
د دې غونډې سمبالوونکی د بنګالي ايکشن کمېټۍ مشر فيروز بنګالي مشال راډيو ته وويل چې له لسیزو راهیسې په پاکستان کې ژوند کوي خو تر اوسه یې خپل وګړي نه ګڼي.
ده وویل، د بنګالیانو شناختي کارډونه نه جوړېږي او چې جوړ شوي دي هغه یې بیرته بند کړي دي.
د پاکستان کورنیو چارو وفاقي وزیر شيخ رشيد څه موده وړاندې په کراچۍ کې خبري غونډې ته ویلي وو چې کابینه به د بنګالیانو او نورو هېوادونو وګړو ته د پاکستاني شناختي کارډ ورکولو یا نه ورکولو پرېکړه کوي.
بنګالي ایکشن کمېټۍ وايي، په پاکستان کې د دوی شمېر ۳۵ لکه دی.
